Vill þitt fyrirtæki vera samstarfsaðili Mottumars?
Nú styttist í Mottumars árlegt árvekni- og fjáröflunarátak Krabbameinsfélagsins í marsmánuði sem tileinkað er baráttunni gegn krabbameinum hjá körlum - Vill þitt fyrirtæki vera samstarfsaðili Mottumars?
„Á Íslandi greinast um 892 karlar á hverju ári með krabbamein. Árlega látast um 317 karlar úr krabbameinum. Í árslok 2021 voru 7630 karlar sem greinst hafa með krabbamein á lífi.”
Allt starf Krabbameinsfélagsins byggir á söfnunarfé. Í gegnum árin hefur félagið átt í afar farsælu samstarfi við fjölda fyrirtækja sem hafa viljað leggja sitt af mörkum í baráttunni gegn krabbameinum. Sá stuðningur og velvild hefur skipt sköpum fyrir starfsemi félagsins sem öll lýtur að því að fækka þeim sem greinast af krabbameinum, fjölga þeim sem lifa af og bæta lífsgæði þeirra sem greinast og aðstandenda þeirra.
Hvernig geta fyrirtæki tekið þátt? Ýmsar útfærslur eru mögulegar fyrir fyrirtæki sem vilja vera samstarfsaðilar:
Selja vöru eða þjónustu og styrkja átakið um ákveðna upphæð eða prósentu af söluverði. (Sjá fjölbreyttar útfærslur hjá samstarfsaðilum Bleiku slaufunnar 2022).
- Gefa hluta af veltu dags eða tímabils til átaksins.
- Gefa fasta upphæð fyrir hverja afgreiðslu eða skráningu.
- Halda Mottumarsboð eða viðburð og safna fé.
# Skráðu þig sem samstarfsaðila hér.
Fyrirtæki fá skattaafslátt vegna styrkja
Já, það er rétt. Fyrirtæki sem styrkja Krabbameinsfélagið geta dregið þá upphæð frá rekstrartekjum, um allt að 1,5% og þannig lækkað skattstofn á því ári sem framlag eða gjöf er veitt. Sjá nánar hér.
Sýnileiki samstarfsaðila á miðlum Krabbameinsfélagsins
Samstarfsaðila er getið á Mottumars.is undir Vinir Mottumars. Þar kemur fram í hverju samstarfið felst. Unnið er að uppfærslu á Mottumarsvefsíðunni og munu framsetningum á upplýsingum um samstarfsaðila verða svipuð og á síðu Bleikuslaufunnar, sem sjá má hér. Jafnframt er vakin athygli á Vinum Mottumars á samfélagsmiðlum félagsins og í rafrænum póstútsendingum (á hátt í 70 þúsund viðtakendur).
- Fyrirspurnir má senda á mottumars@krabb.is.