Kastað til bata

Markmiðið er að veita konum tækifæri til að styrkja sig á líkama og sál með því að æfa fluguköst í fögru umhverfi, njóta samvista við veiðifélaga með svipaða reynslu - og veiða ef heppnin er með.

„Kastað til bata“ er endurhæfingarverkefni á vegum Brjóstaheilla - Samhjálpar kvenna, Krabbameinsfélagsins og styrktaraðila, þar sem konum er boðið til veiðiferðar. Verkefnið hófst árið 2010 og er hugmynd frá Bandaríkjunum „Casting for recovery“  og hugsað sem endurhæfing fyrir konur sem lokið hafa meðferð við brjóstakrabbameini.

Markmiðið er að veita konum tækifæri til að styrkja sig á líkama og sál með því að æfa fluguköst í fögru umhverfi, njóta samvista við veiðifélaga með svipaða reynslu - og veiða ef heppnin er með.  Vanir fluguveiðimenn kenna þátttakendum að kasta flugu og tekið er mið af líkamlegri getu þátttakenda. Hve margir þátttakendur eru hverju sinni fer eftir gistirými en markmið er að hafa 14 konur í hverri ferð.

Tvær ferðir 2021

Í ár átti að fara í Langá á Mýrum en því miður þurfum við að fresta þeirri ferð fram á næsta sumar vegna Covid-19. Okkur þykir þetta mjög leitt en það er samfélagsleg ábyrgð okkar að halda ekki viðburði sem má fresta eins og komið hefur margoft fram hjá þríeykinu okkar.  Á næsta ári (2021) munum við hins vegar fara í tvær ferðir líklega í lok maí. Nánar auglýst síðar.

Okkur langaði virkilega að fara og vorum búnar að hugsa þetta fram og til baka hvernig við gætum gert þetta með því fylgja eftir öllum sóttvarnareglum en það yrði aldrei eins og þið eigið rétt á alvöru ktilb-ferð með gleði og nánd.

„Það er svo dásamlegt að sjá hvað konurnar eru fljótar að tengjast í þessum ferðum og deila sínum persónulegu sögum sem næra þær bæði á líkama og sál. Það gerast einhverjir töfrar í þessum aðstæðum,” segir Auður Elísabet Jóhannsdóttir, verkefnastjóri verkefnisins og ráðgjafi hjá Krabbameinsfélaginu; „Og þó umræðurnar snúist stundum um alvarleg málefni er hláturinn aldrei langt undan.“

https://youtu.be/CgCMDg1roXw

Nánari upplýsingar veitir starfsfólk Krabbameinsfélagsins á netfanginu radgjof@krabb.is eða kaon@krabb.is. Einnig er hægt að hringja í síma 800 4040.

Umsagnir frá þátttakendum:


 „Þetta var sannkallað ævintýri frá upphafi til enda.“

 „Frábær ferð í alla staði, gott að hitta konur sem hafa gengið í gegnum sambærilega hluti og fá upplýsingar um þeirra ferli.“

 „Þvílíkt flott hópefli. Bý að þessu um ókomna tíð. Yndislegur hópur.“

 

https://youtu.be/ZYtE4HFBk4c

Stuðningur styrktaraðila skiptir höfuðmáli til að gera þetta skemmtilega endurhæfingarverkefni að veruleika.

Nánari upplýsingar um verkefnið fást hjá Ráðgjafarþjónustu Krabbameinsfélagsins á netfangið radgjof@krabb.is eða í síma 800 4040.

Kastað til bata hóparnir 2010-2019