Nýgengi brjóstakrabbameins
Rannsókn á áhrifum áhættuþátta og skimunar á tíðni brjóstakrabbameins
Rannsóknin er á vegum Krabbameinsfélags Íslands og býðst öllum konum 18 ára og eldri að taka þátt. Það tekur um 5-10 mínútur að svara spurningalista rannsóknarinnar.
Tilgangurinn er að rannsaka áhrif þekktra áhættuþátta og skimunar á stöðugt hækkandi nýgengi brjóstakrabbameins á Íslandi síðustu áratugi og munu niðurstöðurnar nýtast í forvarnarskyni.
Hinn stutti spurningalisti sem notaður er í rannsókninni byggir á spurningalista sem notaður var árin 1964-2008 á Leitarstöð Krabbameinsfélagsins og kallaðist þá Heilsusögubankinn. Upplýsingar úr honum hafa nýst í margar mikilvægar vísindarannsóknir, einkum í tengslum við brjóstakrabbamein og munu þau gögn sem hér safnast nýtast á sama hátt. Ekki verður hægt að rekja neinar upplýsingar sem gefnar eru upp til einstakra þátttkakenda.
Rannsóknin er unnin í samstarfi við Heilsugæslu höfuðborgarsvæðisins, Háskóla Íslands og háskólans í Osló. Rafræn uppsetning á spurningalista Heilsusögubankans sem og innskráning í rannsóknina var unnin í samstarfi við Maskínu og Taktikal.
Rétt er að benda á í þessu samhengi að krabbameinsskimanir eru núna alfarið á vegum Heilsugæslu höfuðborgarsvæðisins, Landspítalans og Sjúkrahússins á Akureyri.
Ef þú hefur spurningar um könnunina, um rétt þinn sem þátttakandi eða vilt hætta þátttöku, getur þú sent okkur póst á netfangið heilsusogubankinn@krabb.is eða hringt í síma 540 1900.
Einnig er þér velkomið að hafa samband við Vísindasiðanefnd með því að senda póst á netfangið vsn@vsn.is.
