Breytingum á neðri aldursmörkum fyrir brjóstaskimun frestað
-
Guðrún Birgisdóttir, geislafræðingur, í brjóstamyndatöku á Leitarstöð 2019.
Heilbrigðisráðherra hefur ákveðið að breytingar á neðri mörkum skimunaraldurs fyrir brjóstakrabbameinum verði frestað. Hefja átti boðun í brjóstaskimun um 50 ára aldur, en nú verður horfið aftur til fyrra kerfis, þar sem 40-49 ára konur verða áfram boðaðar.
Svandís Svavarsdóttir heilbrigðisráðherra hefur ákveðið að fresta breytingum á neðri mörkum aldursviðmiða vegna lýðgrundaðra skimana fyrir brjóstakrabbameinum. Samkvæmt breytingunum sem tóku gildi 1. janúar 2021 voru neðri mörk aldursviðmiða færð úr 40 ára aldri í 50 ár. Hefur ráðherra nú frestað þessari breytingu, sem þýðir að konur á aldrinum 40-49 ára koma til með að fá áfram boð í brjóstaskoðun líkt og var samkvæmt fyrra kerfi. Efri mörk aldursviðmiða höfðu verið færð úr 69 árum í 74 ár og verður engin breyting gerð þar á.
Í tilkynningu frá heilbrigðisráðuneytinu sem var birt á vef stjórnarráðsins segir að „kynna þurfi betur áformaðar breytingar og fagleg rök að baki þeim.“ Í tilkynningunni kemur einnig fram að Svandís Svavarsdóttir segist hvorki hafa forsendur né ástæður til að draga í efa faglegt mat sérfræðinga skimunarráðs eða embættis landlæknis um aldursviðmið krabbameinsskimana. Skiljanlega veki þó svo miklar breytingar upp spurningar hjá konum sem eiga í hlut. „Það er alveg ljóst af umræðum síðustu daga að þessa breytingu þarf að kynna betur og því hef ég ákveðið að fresta gildistöku þessarar breytingar varðandi skimun krabbameina í brjóstum,“ er haft eftir heilbrigðisráðherra í tilkynningunni.
Krabbameinsfélagið fagnar þessari ákvörðun heilbrigðisráðherra. Fram kom í tilkynningu frá félaginu þann 11. janúar síðastliðinn að nauðsynlegt væri að rökstyðja betur ástæður slíkra breytinga og kynna fyrir konum á Íslandi. Það hefði sömuleiðis vakið upp spurningar að breytingarnar voru ekki í takti við evrópskar leiðbeiningar um skimunaraldur né heldur tillögur frá fagráði um brjóstakrabbamein. Þar var lagt til að neðri mörk skimunaraldurs væru 45 ár. Þessa ákvörðun þyrfti að rökstyðja.
