Sigriður Sólan Guðlaugsdóttir 22. jan. 2019

75% aukning á símtölum til ráðgjafa

  • Radgjafarthjonusta 2019
    Starfsfólk Ráðgjafarþjónustu Krabbameinsfélagsins 2019

Símtölum til Ráðgjafarþjónustu Krabbameinsfélagsins fjölgaði um 75% milli áranna 2017 og 2018 eða um 850 og þeim sem komu í viðtal til ráðgjafa fjölgaði um 27%, úr 1.121 í 1.425. Langflestir sem leita eftir ráðgjöf eru á aldrinum 30-69 ára, flestir á aldrinum 60-69 ára.

Ráðgjafar Krabbameins­félagsins veita ýmis konar fræðslu, ráðgjöf og stuðning við fólk sem hefur greinst með krabbamein og aðstandendur þess. Auk þess er fjöldi námskeiða á dagskrá í viku hverri. 

„Það er virkilega ánægjulegt að sjá þessa þróun og hún staðfestir þá tilfinningu sem við höfum haft að fleiri viti af okkur og þeirri þjónustu sem við bjóðum upp á,“ segir Sigrún Lillie Magnúsdóttir, forstöðumaður Ráðgjafarþjónustunnar: „ Ég finn fyrir miklu þakklæti þeirra sem leita til okkar. Margir lýsa betri líðan eftir að fá tækifæri til að tjá sig og fá góð ráð í veikindaferlinu. Í þessum aðstæðum hafa langflestir þörf fyrir stuðning, það er svo margt hægt að gera og mikilvægt að aðstoða fólk við að finna sína leið, oft í flóknum aðstæðum.  Verst þykir okkur þegar fólk segir að það hefði viljað vita af okkur fyrr. Þess vegna höfum við undanfarið lagt mikla áherslu á að kynna þjónustuna og munum halda því áfram svo þeir sem á þurfa að halda geti leitað til okkar eftir stuðningi eða ráðgjöf.“

Sigrun-Lillie-portret

Sigrún Lillie Magnúsdóttir er forstöðumaður Ráðgjafarþjónustunnar.

Það fjölgaði í ráðgjafarteyminu á síðasta ári í kjölfar átaks Bleiku slaufunnar 2017 en það var 10 ára afmælisár Ráðgjafarþjónustunnar.  Mikil vinna var lögð í að kynna starfsemina og söfnunarféð rann til starfsemi þjónustunnar. Fjöldi starfsmanna tvöfaldaðist, fór úr fjórum í átta, í mismiklu starfshlutfalli.  Með aukningunni er komin meiri breidd í þekkingu teymisins sem samanstendur af félagsráðgjöfum, hjúkrunarfræðingum, sálfræðingi og kynfræðingi.

„Flest viðtölin snúa að upplifun og þörfum hvers og eins, þau geta varðað meðal annars einkenni, hvert á að leita, samskipti, álag og fleira. Mörgum vantar einhvers konar vegvísi um það ferli sem er að hefjast og aðstandendur vilja vita hvað þeir geti gert fyrir þá sem eru nýgreindir,“ segir Sigrún.

Mikill máttur í stuðningnum

„Réttindamál er gjarnan fyrsta leiðin inn hjá mörgum og oft þykir fólki auðveldara að leita eftir ráðgjöf um réttindi sín heldur en að tala um tilfinningar. En þegar þeir átta sig á því sem er í boði er auðveldara að leita eftir frekari stuðningi, ráðgjöf, sækja námskeið eða fyrirlestra,“ segir Sigrún: „Það er líka mikill máttur sem fylgir því að hitta jafningja og tala við aðra sem hafa verið í svipuðum sporum. Það gefur fólki mjög mikið, bæði þeim sem þiggja og líka þeim sem deila.“

Þurfum að ná betur til unga fólksins

Í febrúar hefst námskeið í núvitund fyrir ungt fólk á aldrinum 16-22 ára sem hefur misst náinn ættingja. Þetta er í þriðja sinn sem námskeiðið er haldið og hefur það gengið vonum framar. „Allir sem hafa tekið þátt lýsa því hvað þetta hefur verið mikilvægt í sorgarferlinu. En við höfum átt erfitt með að ná til þessa hóps sem er svo mikil synd því námskeiðið virðist gagnast vel. Nú erum við hins vegar að leita nýrra leiða og vonumst til að geta boðið fleiri ungmenni velkomin á þetta námskeið í framtíðinni.“ 

Námskeið í boði

Auk ráðgjafar og fyrirlestra eru fjölbreytt námskeið á dagskrá Ráðgjafarþjónustunnar. Þar eru til dæmis í boði námskeið í jóga nidra,  slökun, þreytu, kynheilbrigðisnámskeið, svefnnámskeið og stuðningur við þá sem hafa lokið krabbameinsmeðferð. Einnig eru ýmsir stuðningshópar í starfandi bæði á vegum Krabbameinsfélagsins, Krafts og Krabbameinsfélags höfuðborgarsvæðisins. Nánari upplýsingar er að finna á krabb.is.

„Það er gott að byrja á einu námskeiði því oft finnur fólk svo fleiri námskeið eða hópa sem geta komið að góðum notum,“ segir Sigrún að lokum og hvetur þá sem hafa einhverjar spurningar eða vilja aðstoð að hafa samband í síma 800 4040 eða mæta í Skógarhlíð 8. 

Ráðgjafarþjónustan er opin alla virka daga kl. 9-16 nema fimmtudaga þegar opið er til kl.18.


Fleiri nýjar fréttir

30. maí 2023 : Bylting - hálfur milljarður til krabbameinsrannsókna

Vísindasjóður Krabbameinsfélagsins hefur frá stofnun sjóðsins árið 2015 styrkt 41 krabbameinsrannsókn um samanlagt 384 miljónir króna. Næsta úthlutun úr sjóðnum verður í júní næstkomandi.

Lesa meira

30. maí 2023 : Krabbameinsskimanir – mikið fyrir lítið

Áratugir eru síðan skimanir fyrir legháls- og brjóstakrabbameini voru teknar upp á Íslandi. Þær hafa fyrir löngu sannað gildi sitt þó þær veiti aldrei fullkomna vörn. Konur hér á landi hafa með afgerandi hætti sýnt að þær kunna að meta aðgengi að þeim.

Lesa meira

30. maí 2023 : Á Ís­landi greinast um 1800 manns á hverju ári með krabba­mein

Þeir gætu verið færri. Þó að ekki sé hægt að koma í veg fyrir öll krabbamein sýna rannsóknir að áhættuþættir margra krabbameina tengjast lífsstíl. Með bættri lýðheilsu þjóðar er hægt að fækka verulega ákveðnum krabbameinum.

Lesa meira

28. maí 2023 : Lokað 30. maí í ráðgjafarþjónustu vegna vinnufundar ráðgjafarteymis

Lokaða verður hjá ráðgjafarþjónustu Krabbameinsfélagsins þriðjudaginn 30. maí vegna vinnufundar ráðgjafarteymis. Hægt er að senda fyrirspurnir og erindi á radgjof@krabb.is og er þeim svarað eins fljótt og hægt er.

Lesa meira

25. maí 2023 : Bjóðum Brakkasamtökin velkomin í hópinn

Á aðalfundi Krabbameinsfélagsins var staðfest ákvörðun stjórnar um aðild Brakkasamtakanna að Krabbameinsfélagi Íslands. Krabbameinsfélagið fagnar ákvörðun aðalfundarins og býður Brakkasamtökin velkomin í hópinn.

Lesa meira

Var efnið hjálplegt?