Vinnu við endurskoðun sýna flýtt
Unnið er eftir viðbragðsáætlun Krabbameinsfélagsins vegna mistaka við skoðun leghálssýna eftir að í ljós kom að kona sem fékk ranga niðurstöðu úr skimun árið 2018 greindist með krabbamein.
Verið er að flýta skoðun þeirra 6.000 sýna í úrtakinu sem um ræðir. Endurskoðun hefur hingað til leitt í ljós að í 2% tilfella var ástæða til að kalla konur inn til frekari skoðunar. Bætt hefur verið tímabundið í starfsmannahópinn til að flýta enn frekar vinnu við endurskoðun sýnanna.
Í fréttum Stöðvar 2 og RÚV í kvöld kom fram að tvær konur til viðbótar hefðu haft samband við lögmann þar sem þær telja sig einnig hafa orðið fyrir sams konar mistökum. Félagið hefur óskað eftir frekari upplýsingum um þetta frá lögmanni kvennanna.
„Við erum að setja alla krafta okkar í að komast til botns í þessu máli. Þarna urðu alvarleg mistök sem við erum að bregðast við eftir bestu getu og við munum gera það sem þarf,“ segir Ágúst Ingi Ágústsson, yfirlæknir Leitarstöðvarinnar. Ágúst verður í viðtali í Kastljósi RÚV annað kvöld þar sem hann mun fara ítarlegar yfir málið.
Fjöldi kvenna hefur haft samband við Krabbameinsfélagið síðustu daga. Málið hefur skiljanlega vakið upp ótta meðal margra kvenna um hvort mistök kunni að hafa átt sér stað við greiningu í þeirra tilviki. Ekki er talin ástæða til að allar konur sem komið hafa í skimun að undanförnu þurfi að óttast slíkt. Þær konur sem þarf að skoða aftur eru kallaðar jafn óðum í frekari skoðun sé minnsti grunur um frumubreytingar. Ekki hefur komið upp grunur um jafn alvarlegt tilvik og það sem fjallað hefur verið um í fjölmiðlum.
Krabbameinsfélagið harmar þetta hörmulega mál sem nú er til rannsóknar hjá Embætti landlæknis og þær alvarlegu afleiðingar sem það hefur þegar haft.