Taktu þátt í Lífshlaupinu
Lífshlaupið - Landskeppni í hreyfingu hófst 1. febrúar. Starfsfólk Krabbameinsfélagsins hvetur alla til þess að taka þátt. Öll hreyfing hefur áhrif til heilsueflingar og því um að gera að skrá sig til leiks. Munum að margt smátt gerir eitt stór!
Lífshlaupið er heilsu- og hvatningarverkefni Íþrótta- og Ólympíusambands Íslands sem höfðar til allra aldurshópa.
Í Lífshlaupinu eru landsmenn hvattir til þess að huga að sinni daglegu hreyfingu og auka hana eins og kostur er þ.e. í frítíma, vinnu, í skóla og við val á ferðamáta. Í ráðleggingum Embætti landlæknis um hreyfingu er börnum og unglingum ráðlagt að hreyfa sig í minnst 60 mínútur á dag og fullorðnum í minnst 30 mínútur á dag.
Nánari upplýsingar um ráðleggingar um hreyfingu má finna á síðu Embætti landlæknis.
Lífshlaupið stendur fyrir:
- Grunnskólakeppni fyrir 15 ára og yngri frá 1. - 14. febrúar
- Framhaldsskólakeppni fyrir 16 ára og eldri frá 1. - 14. febrúar
- Vinnustaðakeppnifrá 1. - 21. febrúar
Skrá má alla hreyfingu ef hún nær minnst 30 mínútum samtals á dag hjá fullorðnum og minnst 60 mínútum samtals á dag hjá börnum og unglingum. Tímanum má skipta upp í nokkur styttri tímabil yfir daginn s.s. 10 til 15 mín í senn.
Vinnustaðir, skólar og einstaklingar eru hvattir til að taka þátt og nota þannig tækifærið til að efla líkama og sál með því að hreyfa sig daglega.
Nánari upplýsingar er að finna á heimasíðu Lífshlaupsins.
Þín heilsa - Þín skemmtun