Takk fyrir að VERA TIL
Það er óhætt að segja að mikil stemming hafi ríkt á Bíókvöldi Bleiku slaufunnar sem haldið var í Háskólabíói þann 30. september. Kvöldið markaði upphaf Bleiku slaufunnar í ár.
Á Bleika Bíókvöldinu var auglýsing átaksins frumsýn, Láru Guðrúnu Jóhönnudóttur, sem segir sína sögu í ár, og Hlín Reykdal, sem hannaði slaufu ársins, þakkað fyrir þeirra ómetanlega framlag.
Halla Þorvaldsdóttir, framkvæmdastjóri Krabbameinsfélagsins, fór stuttlega yfir starfsemina og af hverju árverkni- og fjáröflunarátak eins og Bleika slaufan er svo mikilvægt og skiptir svo miklu máli.
Árlega greinast að meðaltali um 850 konur með krabbamein og 300 konur deyja að meðaltali úr krabbameinum. Í dag eru 9000 konur á lífi sem fengið hafa krabbamein. Við viljum hins vegar og þurfum að ná enn betri árangri. Starfsemi Krabbameinsfélagsins byggir á stuðningi almennings og fyrirtækja í landinu.
Síðan sáu þær Regína Ósk og Stefanía Svavarsdóttir um að koma gestunum í gírinn fyrir myndina Mamma mia með því að taka nokkur ABBA lög.
Myndirnar frá kvöldinu segja allt um stemminguna sem ríkti. Þökkum ykkur öllum sem komuð og þeim sem stóðu að þessu með okkur kærlega fyrir frábæra kvöldstund.