Sumarhappdrætti Krabbameinsfélagsins 2016 - dregið 17. júní!
Stuðningur við margþætta starfsemi félagsins
Nú hafa verið sendir út miðar í sumarhappdrætti Krabbameinsfélagsins. Í því fá karlmenn heimsenda miða. Vinningar eru að þessu sinni 228 talsins að verðmæti um 39,4 milljónir króna.
Aðalvinningurinn er Toyota RAV4 HYBRID frá bílaumboðinu Toyota að verðmæti um 5,9 milljónir króna. Annar og þriðji aðalvinningarnir eru greiðsla upp í bifreið eða íbúð að verðmæti ein milljón króna. Níutíu vinningar eru í formi úttekta hjá ferðaskrifstofu eða verslun, hver að verðmæti 200 þúsund krónur. Einnig eru 135 vinningar í formi úttekta hjá ferðaskrifstofu eða verslun, hver að verðmæti 100 þúsund krónur. Vinningarnir eru skattfrjálsir. Dregið verður 17. júní. (sjá úrdrátt með því að smella hér)
Allt frá árinu 1955 hefur Krabbameinsfélagið staðið fyrir happdrætti sem hefur verið ein helsta tekjulind félagsins og stuðlað mjög að uppbyggingu þess og þróun. Fræðsla um krabbamein og krabbameinsvarnir, útgáfa fræðslurita, tóbaksvarnir, stuðningur við krabbameinssjúklinga, leit að krabbameini og rannsóknir eru allt þættir í starfsemi félagsins sem byggjast á fjárhagsstuðningi við félagið.
Krabbameinsfélagið hvetur stuðningsmenn sína til að bregðast vel við og kaupa heimsenda miða. Happdrættismiðarnir eru sendir sem greiðsluseðlar til að auðvelda þeim sem vilja taka þátt í happdrættinu að greiða miðana í heimabanka/netbanka og eiga jafnframt möguleika á glæsilegum vinningum. Miðar eru einnig til sölu á skrifstofu Krabbameinsfélagins að Skógarhlíð 8. Upplýsingar eru gefnar í síma 540 1900. Einnig má hafa samband ef óskað er eftir að borga með greiðslukorti. Krabbameinsfélagið hefur haft það fyrir venju í marga áratugi að hringja í vinningshafa og tilkynna þeim um vinninga. Krabbameinsfélag Reykjavíkur hefur umsjón með framkvæmd og rekstri happdrættis Krabbameinsfélagsins.
Ár hvert greinast að meðaltali um 1.450 manns með krabbamein hér á landi. Hjá körlum er krabbamein í blöðruhálskirtli algengast og brjóstakrabbamein hjá konum. Í öðru sæti er lungnakrabbamein hjá báðum kynjum og ristilkrabbamein í því þriðja. Nú eru um 13.100 einstaklingar á lífi sem fengið hafa krabbamein. Þriðji hver Íslendingur fær krabbamein einhvern tíma á lífsleiðinni. Um fjórðung dauðsfalla á Íslandi má rekja til krabbameins.
