Sendu pabba mikilvæg skilboð á Feðradaginn
Í tilefni af Feðradeginum, sunnudaginn 14. nóvember, hvetur Krabbameinsfélagið alla til að senda pabba mikilvæg skilaboð - því við viljum hafa pabbana sem lengst á meðal okkar, við sem besta heilsu.
Það er staðreynd að karlar draga almennt lengur en konur að leita til læknis finni þeir fyrir einkennum. Það er áríðandi að bregðast hratt við mögulegum einkennum krabbameins, því ef í ljós kemur að þau tengjast krabbameini skiptir tíminn miklu máli.
Hvað getum við gert til að ýta við pabba?
- Segðu pabba að fara inn á pabbamein.is, og kynna sér helstu einkenni krabbameina.
- Skráðu pabba í Karlaklúbbinn og segðu honum að það skipti þig máli að hann sé meðvitaður um einkenni krabbameina og mikilvægi þess að bregðast skjótt við. Skráning í klúbbinn felur í sér að hann fær senda tölvupósta nokkrum sinnum á ári með fróðleik og hvatningu, sér að kostnaðarlausu.
- Biddu pabba um að taka Pabbameinsprófið til að sjá hvort hann sé með helstu staðreyndir um einkenni og áhættuþætti á hreinu. Því fyrr sem krabbamein uppgötvast, því meiri líkur eru á bata.
- Besti pabbinn: Taktu mynd af þér og pabba og settu í prófile og sendu honum. (leiðbeiningar: https://www.twibbonize.com/pabbamein).
Líkur á að greinast með krabbamein aukast jafnt og þétt eftir fimmtugt. Stór hluti þeirra sem greinast eru feður og því köllum við þessi mein pabbamein.
