Björn Teitsson 25. feb. 2021

Sameiginleg yfirlýsing Heilsugæslunnar og Landspítala vegna skimunarverkefnis

Heilsugæslan og Landspítali eru samstíga við yfirfærslu skimunarverkefnis, segir í sameiginlegri yfirlýsingu. Krabbameinsfélagið ítrekar óskir sínar um velfarnað í því mikilvæga verkefni og hvetur konur til þátttöku. 

Krabbameinsfélagið birtir hér upprunalega yfirlýsingu en hana má einnig finna hér .


„Umfangsmiklar og mikilvægar breytingar voru gerðar á skipulagi, stjórn og framkvæmd skimunar fyrir krabbameinum um síðustu áramót, samkvæmt ákvörðun heilbrigðisráðherra, sem byggja á tillögum frá Embætti landlæknis og skimunarráði. Landspítali, í samvinnu við Sjúkrahúsið á Akureyri, tók þá að sér framkvæmd skimunar fyrir krabbameini í brjóstum og sérskoðun á brjóstum og leghálsi en heilsugæslan um land allt fékk það hlutverk að annast framkvæmd skimana fyrir krabbameini í leghálsi. Heilsugæslan ákvað í kjölfarið að semja við danska rannsóknarstofu um sýnagreiningu. Í öllum þessum verkefnum eru gæði þjónustunnar höfð að leiðarljósi og í hvívetna leitast við að tryggja heilsu og öryggi skjólstæðingahópsins.

Íslensk heilbrigðisþjónusta stendur saman að baki þessu heildarverkefni sem snýr að vandasamri og viðkvæmri yfirfærslu margvíslegra verkefna frá Krabbameinsfélagi Íslands yfir til Heilsugæslunnar, Landspítala og Sjúkrahússins á Akureyri. Yfirfærslan hefur því miður ekki verið hnökralaus, ýmissa hluta vegna, og skapað bæði áhyggjur og óöryggi í samfélaginu. Í ljósi umræðu síðustu daga um þetta nýja fyrirkomulag vilja Heilsugæslan og Landspítali taka fram að aðstandendum verkefnisins þykir mjög miður að óvissa hafi skapast um þessa mikilvægu þjónustu. Við slíkt verður ekki búið og keppast nú allir aðilar verkefnisins við að bæta þar úr með fjölbreyttum hætti.

Þar má nefna að Heilsugæslan mun nú setja aukið afl í netspjall við skjólstæðinga á Heilsuvera.is og bjóða þar upp á sérstaka svarþjónustu hjúkrunarfræðinga og ljósmæðra um skimanir fyrir legháls- og brjóstakrabbameinum. Landspítali mun leggja Heilsugæslunni lið í þessari svarþjónustu, eftir því sem þörf krefur. Mikilvægt er að fólk sem upplifir óvissu eða óöryggi hafi samband við netspjallið á Heilsuvera.is þar sem markmiðið er að svara sértækum spurningum hvers og eins.

Markmiðið með nýja fyrirkomulaginu er að bæta aðgengi að skimun bæði legháls- og brjóstakrabbameina í þéttu samstarfsneti mismunandi aðila íslenskrar heilbrigðisþjónustu. Verklagið er samkvæmt því sem mælt er með í alþjóðlegum skimunarleiðbeiningum til að tryggja frekar öryggi og gæði þjónustunnar og er jafnframt í samræmi við framtíðarsýn og meginmarkmið heilbrigðisstefnu til ársins 2030. Embætti landlæknis fer með stjórn hópleitarinnar og ber ábyrgð á henni, sinnir gæðaeftirliti og heldur skimunarskrá.

Meðal fleiri framfaraskrefa í þessu verkefni var að sett var á fót Samhæfingarstöð krabbameinsskimana, sem meðal annars hefur það verkefni að boða fólk í reglubundna skimun og veita upplýsingar um niðurstöður skimana. Samhæfingarstöðin heyrir undir Heilsugæslu höfuðborgarsvæðisins en starfar á landsvísu. Einnig má nefna að innan skamms verður opnuð öflug brjóstamiðstöð Landspítala á Eiríksstöðum í Reykjavík þar sem þessum mikilvæga og viðkvæma hópi skjólstæðinga verður sinnt af kostgæfni. Sá stóri áfangi verður mikið gleðiefni fyrir heilbrigðisþjónustuna í landinu.

Virðingarfyllst,

Óskar Reykdalsson, forstjóri Heilsugæslunnar á höfuðborgarsvæðinu
Páll Matthíasson, forstjóri Landspítala“


Fleiri nýjar fréttir

KRA_MM2020_krabb-is_banner-hreyfing_1000x538_at2x

8. apr. 2021 : Mottumarsherferðin frá 2020 tilnefnd til Lúðursins

Mottumarsherferðin frá 2020, þar sem Laddi hvatti þjóðina til að hreyfa sig með dyggri aðstoð góðra manna, hefur verið tilnefnd til Lúðursins í flokki kvikmyndaðra auglýsinga í flokki samfélagsauglýsinga. 

Lesa meira
Silla

7. apr. 2021 : „Þetta er ekki aðeins til hins verra.“ Jens Pétur Jensen í Segðu mér á Rás 1

Jens Pétur Jensen fór að finna fyrir óvenjulegum verkjum en hugsaði ekki mikið út í þá. Hann fór sjaldan til læknis og kveinkaði sér aldrei. En þetta var krabbamein. Frá greiningu hefur Jens hins vegar sett sér ákveðin markmið og ákvað að sjá ljósið í myrkrinu. 

Lesa meira
Skógarhlíð

6. apr. 2021 : Covid-19 og nýgengi krabbameina - grein í Læknablaðinu

Í nýjasta tölublaði Læknablaðsins má finna grein sem er meðal annarra skrifuð af sérfræðingum sem starfa við rannsókna -og skráningarsetur Krabbameinsfélagsins. 

Lesa meira
Screen-Shot-2021-03-31-at-11.18.46

31. mar. 2021 : Mataræði skiptir máli - frábær Mexíkó-fiskréttur frá Sigurveigu

Sigurveig Káradóttir er landsþekkt fyrir fádæma góðan smekk og tilþrif við matreiðslu. Hún var svo væn að leyfa okkur að fá afar girnilega uppskrift að Mexíkó-fiskrétti sem væri frábær á föstudaginn langa. 

Lesa meira

28. mar. 2021 : Kastað í lag til stuðnings starfi Krabba­meins­félagsins

„Mig langar til að láta gott af mér leiða og leggja mitt af mörkum til að styðja öflugt starf Krabbameinsfélagsins“ segir Kristján R. Guðnason sem var að gefa út lagið „Lífsins ljós” sem tileinkað er félaginu og starfi þess.

Lesa meira

Var efnið hjálplegt?