Ráðgjafarþjónustan fagnar tíu ára afmæli
Samstarfsfólk og velunnarar Ráðgjafarþjónustunnar fylltu húsnæði þjónustunnar í gær þegar blásið var til veislu í tilefni af því að tíu ár eru liðin frá því starfsemin hóf göngu sína með núverandi sniði.
Ljúfir tónar Ómars og Óskars Guðjónssona hljómuðu á meðan gestir gæddu sér á veitingum og spjölluðu og Ari Eldjárn flutti gamanmál við góðar undirtektir gesta. Við þetta tækifæri frumsýndi kynningardeildin myndband sem hún framleiddi um afmælisbarnið þar sem fjöldi manns sagði frá tengingu sinni við þjónustuna og var gerður góður rómur að myndbandinu.
Ráðgjafarþjónustan þakkar öllum þeim sem sýndu hlýhug bæði með því að koma og senda kveðju í tilefni dagsins.
