Núvitund fyrir ungmenni sem hafa misst ástvin
Krabbameinsfélagið býður nú upp á námskeið í núvitund fyrir aðstandendur á aldrinum 16-22 ára.
Rannsóknir sýna að núvitundarþjálfun og meðferð hefur jákvæð áhrif á líðan, getur aukið gæði daglegs lífs, bætt heilsufar og dregið úr streitu, kvíða og depurð. Þetta eru algengir kvillar hjá þeim sem missa nákominn ástvin.
„Það er mikið áfall að missa ástvin og erfitt í þeim aðstæðum að hafa stjórn á tilfinningum, sorgin getur verið djúp og vanlíðan mikil. Það hefur gjarnan mikil áhrif á lífið, meðal annars nám, vinnu og vinskap,“ segir Sigrún Lillie Magnúsdóttir, forstöðumaður Ráðgjafarþjónustunnar.
Námskeiðið byggir á MBCT (Mindfulness-Based Cognitive Therapy) og var gagngert hannað sem fyrirbyggjandi inngrip fyrir fólk með endurtekið eða þrálátt þunglyndi en hefur síðan verið þróað sem úrræði fyrir margvíslega sálræna erfiðleika.
Í núvitundarþjálfun er tvinnað saman núvitund, aðferðum hugrænnar atferlismeðferðar og sálfræði austrænnar visku. Námskeiðið er tvískipt. Á fyrra námskeiðinu, fjögur skipti, er farið í grunnþjálfun á núvitund, núvitundaræfingar, fræðslu og umræður. Á seinna námskeiðinu er iðkunin dýpkuð og tekist á við sorgarferlið og aðra erfiðleika með aðferðum núvitundar.
Leiðbeinandinn er Edda Margrét Guðmundsdóttir sálfræðingur sem hefur sérhæft sig í núvitundarmiðaðri meðferð.
Mæla með námskeiðinu
„Það getur verið gagnlegt við þessar aðstæður að hitta aðra í svipuðum sporum og sjá að maður er ekki einn. Allir þátttakendur á fyrra námskeiðinu hafa valið að taka seinna námskeiðið líka. Þeir hafa talið það hafa góð áhrif og mæla með námskeiðinu fyrir aðra,“ segir Sigrún.
„Þeim fannst námskeiðið hjálpa með einbeitingu, nám og dagleg verkefni eins og að tala við ókunnuga, halda fyrirlestra og koma sér að verki. Þá fannst þeim gagnlegt að læra að takast á við lífið einn dag í einu, ekki síst á þeim dögum sem voru erfiðir.“
Næsta námskeið hefst 7. febrúar og frekari upplýsingar um skráningu er að finna hér .
