Mottumarssokkarnir komnir til að vera
Árið 2018 voru í fyrsta sinn kynntir til sögunnar Mottumarssokkar til styrktar Mottumarsátakinu. „Forsetasokkarnir“ eins og þeir voru kallaðir, slógu í gegn.
Árið 2019 vann Anna Pálína Baldursdóttir samkeppni Listaháskóla Íslands og Krabbameinsfélagsins um hönnunina.
„Það verður því spennandi að sjá hvernig sokkarnir verða í ár, því við fengum til liðs við okkur smekkmennina í Kormáki og Skildi til að sjá um hönnunina,“ segir Kolbrún Silja Ásgeirsdóttir, fjáröflunarstjóri Krabbameinsfélagsins. Mottumars er árlegt átaksverkefni
Krabbameinsfélagsins sem tileinkað er baráttunni gegn krabbameinum hjá körlum. Meginmarkmið þess er að sinna fræðslu, forvörnum, rannsóknum, ráðgjöf og stuðningi fyrir karlmenn og að hvetja alla karlmenn og fjölskyldur þeirra til að vera meðvitaða um einkenni krabbameina.
Mottan lifir
Aðspurð um hvort yfirvaraskeggið, sem var einkenni átaksins um árabil, sé nú horfið í skuggann af sokkunum, segir Kolbrún ekki svo vera. „Við ákváðum hins vegar að hvíla skeggsamkeppnina um tíma, en fögnum engu að síður yfirvaraskeggjum í marsmánuði og hvetjum karlmenn til að sýna stuðning í verki með sokkum og skeggi.“