Mottumarssokkar koma til landsins á morgun
Sending með Mottumarssokkum sem koma áttu til landsins um miðja síðustu viku er enn ekki komin til landsins.
Síðasti áfangastaður sokkanna var Dublin á Írlandi, en afar slæm veðurskilyrði þar í síðustu viku urðu til þess að frakthluta flugvallarins var lokað og sokkarnir urðu innlyksa. Í kjölfarið skapaðist ringulreið á vellinum þar sem frakt hlóðst upp en verið er að greiða úr þeim málum í dag.
Nú hefur verið staðfest að sendingin komi til landsins á morgun, miðvikudag, og verða sokkar þá sendir án tafar í verslanir um allt land og afgreiddir til viðskiptavina sem hafa pantað á netinu.
„Við þökkum þolinmæði viðskiptavina okkar og sýndan stuðning, og vonum að þessi töf komi ekki að sök,“ segir Halla Þorvaldsdóttir, framkvæmdastjóri Krabbameinsfélagsins; „Yfirleitt eru það veður á Íslandi sem orsaka tafir, en ekki öfugt."