Mottumarsbragur á styttum bæjarins
Í laginu góða eftir Spilverk þjóðanna segir frá grey styttunum sem standa aleinar á stöllunum og sumar allsberar. Því hefur verið kippt í liðinn, því vel valdar styttur í miðbæ Reykjavíkur skarta nú borðunum úr Frestunarsamkeppni Mottumars og eru reiðubúnar fyrir Mottudaginn 31. mars næstkomandi.
Stytturnar eru sýnileg áminning til karlmanna að humma ekki fram af sér heilsuna, heldur þekkja einkenni krabbameina og draga það ekki að leita til læknis ef einkenna verður vart. Eins og flestum er vonandi þegar kunnugt er yfirskrift átaksins í ár „Ekki humma fram af þér heilsuna“ og vísar til þess að nýleg rannsókn Krabbameinsfélagsins sýndi fram á að karlmenn sem greindust með krabbamein eftir að hafa fundið fyrir einkennum biðu margir í langan tíma með að leita til læknis.
https://www.youtube.com/watch?v=mCS2X8FtSAo
Við hvetjum fólk til að gera sér ferð til að kíkja á styttur bæjarins.
Rétt er að taka fram að öll tilskilin leyfi voru fengin varðandi borðana.
Þetta eru stytturnar sem um ræðir:
- Ingólfur Arnarson - á Arnarhóli
- Hannes Hafstein - fyrir framan Stjórnarráðið
- Tómas Guðmundsson - á bekk við Tjörnina
- Minnisvarði um óþekkta embættismanninn - við Iðnó
- Ólafur Thors - við Tjörnina
- Séra Friðrik og drengurinn - horni Amtmannsstígs og Lækjargötu
- Vatnsberinn - horni Bankastrætis og Lækjargötu
