Krabbameinsfélagið harmar mistök
Krabbameinsfélagið harmar mistök sem urðu í leghálsskimun árið 2018 og fjallað var um í fréttum Stöðvar tvö í kvöld. Á síðasta ári tók félagið í notkun nýja tölvustýrða smásjá sem dregur verulega úr líkum á að sams konar mistök geti endurtekið sig.
Yfirlæknir Krabbameinsfélagsins segir að skimun sé ekki 100% örugg og mistök geti gerst en séu afar fátíð.
„Það er þyngra en tárum taki að vita að hægt hefði verið að koma í veg fyrir að frumubreytingar í leghálsi yrðu að krabbameini. Hvert einasta krabbameinstilfelli sem hægt er að koma í veg fyrir eða greina á byrjunarstigum skiptir máli. Við biðjum konuna og aðstandendur hennar innilega afsökunar á þessum hörmulegu mistökum,“ segir Ágúst Ingi Ágústsson, yfirlæknir Leitarstöðvar Krabbameinsfélagsins.
Árlega eru skoðuð um 27 þúsund leghálssýni á frumurannsóknarstofu Leitarstöðvar Krabbameinsfélagsins. Um leið og málið kom upp var gripið til viðeigandi ráðstafana á Leitarstöðinni varðandi endurskoðun sýna síðustu þriggja ára sem er sá tími sem á að líða á milli skimana hjá konum. Ef þörf krefur mun starfsfólk hafa samband við konur og bjóða þeim aftur í skimun. Landlækni var strax tilkynnt um málið.
Á Íslandi hefur dánartíðni af völdum leghálskrabbameins lækkað um 83% og með reglubundinni skimun fyrir leghálskrabbameini má koma í veg fyrir 90% tilfella leghálskrabbameins. Skimun fyrir leghálskrabbameini hefur því ótvírætt sannað gildi sitt. Konur eru eindregið hvattar til að nýta sér boð um þátttöku í skimun.
„Ísland er ekki frábrugðið nágrannalöndunum að því leyti að upp geta komið tilfelli með falskt neikvæðum niðurstöðum, þ.e. að ekki greinast frumubreytingar þó þær séu til staðar. Það er sem betur fer afar sjaldgæft að upp komi tilfelli leghálskrabbameins þar sem skimunarsýni hefur ranglega verið metið eðlilegt,“ segir Ágúst.
Hægt er að panta tíma í skimun hjá Leitarstöðinni í síma 540 1919.
Krabbameinsfélagið býður einnig upp á ráðgjöf og stuðning án endurgjalds. Hægt er að hringja í síma 800 4040 virka daga og senda tölvupóst á radgjof@krabb.is."
