Hvatningarbönd fyrir hlaupara í Reykjavíkurmaraþoni
-
Arnar Pétursson og Berglind Alda Ástþórsdóttir með böndin góðu. Arnar stefnir á þátttöku í Ólympíuleikum og Berglind hefur nú safnað 142 þúsund krónum í áheit fyrir Krabbameinsfélagið.
Krabbameinsfélagið býður öllum hlaupurum sem taka þátt í Reykjavíkurmaraþoninu ennisband eða fyrirliðaband með slagorðunum „Ég hleyp af því ég get það.“
Böndin verða afhent á sýningunni Fit & Run í Laugardalshöll í dag frá klukkan 15-20 og á morgun, föstudag, klukkan 14-19. Einnig verða gefnir sokkar úr Mottumarsátakinu sem gengu af í átakinu í vor.
„Okkur finnst þetta frábæra slagorð sem við fengum að láni frá Gunnari Ármannssyni, hlaupara, ramma vel inn áherslu okkar á hreyfingu sem forvörn gegn krabbameinum. Um leið og við þökkum þeim fjölmörgu hlaupurum sem hlaupa fyrir félagið viljum við hvetja alla hlaupara til dáða í Reykjavíkurmaraþoninu með því að gefa bönd með þessum einkunnarorðum „Ég hleyp af því ég get það,“ segir Halla Þorvaldsdóttir, framkvæmdastjóri Krabbameinsfélagsins.
Flestir vita að hreyfing af öllu tagi er góð fyrir heilsuna. Líklega eru færri sem vita að regluleg hreyfing í 30 mínútur á dag getur minnkað líkur á ýmsum tegundum krabbameina svo sem í ristli og endaþarmi, brjóstum og legbol. Rannsóknir sýna að einstaklingar sem hreyfa sig reglulega greinast sjaldnar með krabbamein en þeir sem hreyfa sig lítið sem ekkert.