Forsetanum afhent fyrsta Mottumarssokkaparið
-
Guðni Th. Jóhannesson, forseti Íslands, Gunnar Hilmarsson, hönnuður Mottumars-sokkana, og Isabel Mía Gunnarsdóttir á Bessastöðum í dag þegar forsetinn fékk afhent fyrsta Mottumarsparið.
Forseta Íslands var í dag afhent fyrsta Mottumars-sokkaparið á Bessastöðum. Sokkarnir eru hannaðir af Gunnari Hilmarssyni, yfirhönnuði Kormáks og Skjaldar.
Mottumars er árlegt verkefni Krabbameinsfélagsins, sem er í senn vitundarvakning um krabbamein hjá körlum og fjáröflun fyrir félagið. Í ár leggjum við áherslu á gildi hreyfingar sem forvarnar gegn krabbameinum. Rannsóknir sýna að reglubundin hreyfing dregur úr líkum á krabbameinum auk þess sem hreyfing er til góðs fyrir fólk sem hefur greinst með krabbamein.
Með heilsusamlegum lífsstíl er hægt að koma í veg fyrir 4 af hverjum 10 krabbameinum. Krabbameinsfélagið vinnur að forvörnum gegn krabbameinum og hefur það að markmiði að fækka þeim sem greinast með krabbamein. Starfsemi félagsins byggir alfarið á styrkjum einstaklinga og fyrirtækja og með kaupum á Mottumarssokkum leggur fólk stórt lóð á vogarskálarnar.
Glaður hópur á Bessastöðum í dag.
