Fjórtán konur kasta til bata
Verkefnið „Kastað til bata” fór fram í þrettánda skiptið í byrjun júní. Fjórtán konur tóku þátt og dvöldu við Langá á Mýrum í blíðskaparveðri og nutu leiðsagnar í stangveiði.
Auk þátttakendanna fjórtán önnuðust níu konur úr Stangveiðifélagi Reykjavíkur um leiðsögn og kennslu. Það er í fyrsta skiptið sem allir leiðsögu- og aðstoðarmenn eru konur.
Markmiðið er að veita konum tækifæri til að styrkja sig á líkama og sál með því að æfa fluguköst í fögru umhverfi og njóta samvista við veiðifélaga með svipaða reynslu.
„Kastað til bata“ er endurhæfingarverkefni á vegum Brjóstaheilla - Samhjálpar kvenna, Krabbameinsfélagsins og styrktaraðila, þar sem konum er boðið til veiðiferðar. Verkefnið hófst árið 2010 og er hugmynd frá Bandaríkjunum „Casting for recovery“ og hugsað sem endurhæfing fyrir konur sem lokið hafa meðferð við brjóstakrabbameini. Þetta er því í þrettánda sinn sem „Kastað til bata“ verkefnið er í boði.
