Fjölsótt málþing skorar á heilbrigðisyfirvöld að setja brjóstaheilsu í forgang
Málþing um brjóstakrabbamein fór fram miðvikudaginn 20. október að viðstöddu fjölmenni. Auk þess var fylgst með dagskránni í gegnum streymisveitu Krabbameinsfélagsins á ríflega 100 stöðum um land allt.
Horfur eftir greiningu brjóstakrabbameins hér á landi hafa verið mjög góðar en nú eru vísbendingar um að Ísland sé að dragast aftur úr miðað við hin Norðurlöndin.
Brynja Björk Gunnarsdóttir, formaður Brjóstaheilla – Samhjálpar kvenna, setti málþingið og Íris Róbertsdóttir, bæjarstjóri Vestmannaeyja annaðist fundarstjórn. Lára Guðrún Jóhönnudóttir deildi reynslu sinni með gestum en önnur erindi voru þessi:
Horfur íslenskra kvenna með brjóstakrabbamein: Helgi Birgisson yfirlæknir á Rannsókna- og skráningarsetri Krabbameinsfélagsins
Gæðaskráning – hagur krabbameinsgreindra: Hrefna Stefánsdóttir sérfræðingur á Rannsókna- og skráningarsetri Krabbameinsfélagsins
Brjóstaheilsa á tímamótum – Brjóstakrabbamein, mikilvægi skimunar og reynsla erlendis: Ólöf Kristjana Bjarnadóttir krabbameinslæknir á Landspítalanum
Brjóstaheilsa á tímamótum – Sjúkdómar í brjóstum / Aðgengi að sérfræðingsþjónustu og framtíðarsýn: Svanheiður Lóa Rafnsdóttir brjóstaskurðlæknir á Landspítalanum
Áskorun til heilbrigðisyfirvalda
Eftirfarandi áskorun var borin upp og samþykkt:
Brjóstakrabbamein er algengasta krabbamein kvenna á Íslandi. Í hverri viku greinast fjórir til fimm einstaklingar með brjóstakrabbamein, langflestir eru konur, 235 á hverju ári. Að meðaltali deyja 50 konur hér á landi á ári úr brjóstakrabbameini. Til að lækka dánartíðni af völdum brjóstakrabbameins og minnka likur á endurkomu þess er mikilvægt að greina krabbameinin á byrjunarstigi.
Þátttakendur málþingsins „Verum til” skora á heilbrigðisyfirvöld að setja brjóstaheilsu í forgang,
Í því felst til dæmis:
- að tryggja að aðgengi fólks sem hafa einkenni í brjóstum að sérhæfðri skoðun sé gott og ferlið, frá því einkenni koma fram, þar til rannsókn er gerð, skýrt og einfalt.
- að unnið sé markvisst að því að auka þátttöku kvenna í skimunum fyrir brjóstakrabba-meinum, til dæmis með skipulagðri hvatningu til kvenna, að skimun sé ókeypis og að gott aðgengi sé að henni í nærumhverfi. Vel skipulögð og framkvæmd skimun bjargar mannslífum og lækkar dánartíðni um 20-30%.
Við búum í fámennu landi sem ætti að gera okkur auðveldara að búa til kerfi þar sem fólkið og bætt þjónusta við það er í forgrunni.
Stór hluti þeirra sem greinast með brjóstakrabbamein eru hraustir einstaklingar í blóma lífsins. Mikið er í húfi að greina meinin sem fyrst, sem eykur líkur á að þeir lifi áfram góðu lífi.
Sofnum ekki á verðinum, tökum brjóstaheilsu alvarlega.
Upptaka frá málþinginu
Upptaka frá málþinginu er aðgengileg í streymisveitu Krabbameinsfélagsins:
