Fjölsmiðjan fær tölvur frá Krabbameinsfélaginu
Krabbameinsfélagið gat losað sig við nokkuð magn af borðtölvum og vaknaði sú hugmynd að þær gætu komið að gagni annars staðar. Fjölsmiðjan, framleiðslu-og fræðslusetur fyrir ungt fólk, ætlar að sjá til þess að svo verði.
Þeir Ásbjörn Torfason og Helgi Snær Ólason frá Fjölsmiðjunni voru hæstánægðir með tölvugjöfina. Um er að ræða 15 borðtölvur frá Dell sem eru vel til þess fallnar að vera notaðar við nám og störf. Fjölsmiðjan sinnir mikilvægu hlutverki þegar kemur að félagslegum úrræðum fyrir unglinga og ungt fólk. Þar hefur farið fram magnað frumkvöðlastarf við menntun og starfsþjálfun yngra fólks, þar eru búin til verðmæt tengsl við atvinnulífið, framhaldsskóla og aðrar menntastofnanir sem reynast skjólstæðingum og starfsfólki vel út lífið. Krabbameinsfélagið vonar innilega að tölvugjöfin komi að góðum notum.