Engin gögn fundist sem styðja ummæli Tryggva
„Ég hef á þessari stundu ekki séð gögn sem gætu staðið undir þessari fullyrðingu,“ sagði María Heimisdóttir, forstjóri Sjúkratrygginga Íslands, í kvöldfréttum Stöðvar 2 í kvöld um þær fullyrðingar sem Tryggvi Björn Stefánsson hélt fram í Kastljósi síðastliðinn fimmtudag.
Með þessari yfirlýsingu hafa SÍ eytt þeirri óvissu sem þau ummæli ollu um hæfi Leitarstöðvarinnar til að framkvæma skimanir.
Að ósk Sjúkratrygginga Íslands sendu Krabbameinsfélagið og Leitarstöð Krabbameinsfélagsins SÍ staðfestingu á að starfsemi Leitarstöðvar uppfyllti kröfur varðandi mönnun, vinnuferla, búnað og annað.
Forstjóri Sjúkratrygginga sagði ennfremur í sjónvarpsfréttum í kvöld:
„Við höfum treyst Krabbameinsfélaginu til þess að annast þessa mikilvægu þjónustu hingað til og yfirvöld hafa óskað eftir því að Krabbameinsfélagið geri það áframt til áramóta,“ sagði María í fréttum Stöðvar 2 og í kvöldfréttum RÚV sagði hún: „Við höfum treyst Krabbameinsfélaginu fyrir þessari mikilvægu þjónustu um margra ára skeið,“ og: „Við höfum þegar falið Krabbameinsfélaginu að halda sinni þjónustu áfram til áramóta.“
Stjórn félagsins fagnar því að ummæli Tryggva Björns Stefánssonar valdi ekki lengur efa um hæfi félagsins til að framkvæma skimanir og í því ljósi heldur starfsemi Leitarstöðvarinnar áfram með óbreyttu sniði.
Krabbameinsfélagið vinnur áfram með Embætti landlæknis sem hefur hið alvarlega atvik sem upp kom á Leitarstöð til skoðunar.
