Endurnýjun íbúða fyrir þá sem sækja krabbameinsmeðferð utan af landi
Krabbameinsfélagið rekur átta íbúðir í Reykjavík sem nú hafa fengið tímabæra endurnýjun.
Það getur skipt sköpum að hafa öruggan dvalarstað í Reykjavík fyrir þá sem búa á landsbyggðinni en þurfa að sækja krabbameinsmeðferð í Reykjavík. Meðferð stendur stundum yfir í nokkra daga, en oft getur hún tekið margar vikur.
Krabbameinsfélagið rekur átta íbúðir á Rauðarárstíg fyrir fólk í þessari stöðu og aðstandendur þeirra. Það getur reynst sjúklingum og fjölskyldum þeirra afar dýrmætt að geta dvalið í göngufæri við spítalann á meðan á rannsóknum eða meðferðum stendur. Alls voru 1.990 gistinætur nýttar í íbúðunum á síðasta ári.
Á undanförnum mánuðum hafa íbúðirnar verið málaðar, baðherbergi gerð upp og innbú og húsgögn endurnýjuð. Allt með það að markmiði að búa fólki heimilislegan og þægilegan samastað á meðan það tekst á við krefjandi verkefni.