Eftirspurn eftir ráðgjöf eykst
-
Við erum við símann. Ráðgjafarteymi Krabbameinsfélagsins samansendur af félagsráðgjafa, sálfræðingum, hjúkrunarfræðingum og lækni.
Viðtölum sem ráðgjafar Krabbameinsfélagsins veita þeim sem greinst hafa með krabbamein og aðstandendum þeirra fjölgaði um 62% á milli áranna 2018 og 2019 og samtölum í símaráðgjöf um 27%.
Hluta aukningarinnar má rekja til þess að ráðgjöf var efld hjá Krabbameinsfélagi Akureyrar og nágrennis í byrjun árs 2019. Þá var ráðgjöf með tölvupóstum svipuð og á fyrra ári.
Flestir sem leita til félagsins eftir ráðgjöf hafa verið greindir með krabbamein, eða tæplega 1.500, en næst á eftir, eða um helmingi færri, eru aðstandendur, 750. Syrgjendur nýta sér einnig ráðgjöf og þeim fjölgaði hlutfallslega á milli ára úr 141 í 350 árið 2019.
„Fleiri vita af okkur og vitund fólks um mikilvægi stuðnings hefur aukist. Það er svo ótrúlega margt hægt að gera til að létta undir með fólki í þessum aðstæðum og þá á ég jafnt við þann sem greinist með krabbamein og aðstandendur“ segir Sigrún Lillie Magnúsdóttir, forstöðumaður Ráðgjafarþjónustunnar hjá Krabbameinsfélaginu.
Konur nýta sér þjónustuna í meira mæli en karlar og voru 2/3 á móti 1/3 karlmanna.
„Við viljum því hvetja karlmenn sérstaklega til að leita til okkar líka. Hjá okkur er alltaf heitt á könnunni og það er opið alla virka daga. Það er hægt að kíkja við í spjall ef fólk er á ferðinni, hringja, nú eða koma og sækja einhvern þeirra fjölmörgu fyrirlestra eða námskeiða sem við höldum hér,“ segir Sigrún að lokum.
Fjölbreytt námskeið eru á dagskrá hjá félaginu í viku hverri auk ráðgjafar og stuðnings, til dæmis námskeið í jóga nidra, slökun, kynheilbrigðisnámskeið, svefnnámskeið og stuðningur við þá sem hafa lokið krabbameinsmeðferð.
Einnig eru ýmsir stuðningshópar starfandi bæði á vegum Krabbameinsfélagsins, Krafts og Krabbameinsfélags höfuðborgarsvæðisins. Mánaðarlegum fyrirlestrum er streymt á netinu.
Nánari upplýsingar er að finna á krabb.is.
Opið er virka daga kl. 9-16
nema fimmtudaga, en þá er opið
kl. 9-18. Síminn er 800 4040.
Tölvupóstur er radgjof@krabb.is