Dánartíðni vegna leghálskrabbameins lækkað um 83% vegna skimana
Frá því skipuleg leit að leghálskrabbameini hófst hjá Krabbameinsfélaginu árið 1964 hafa rúmlega 900 konur greinst með sjúkdóminn, tæplega 300 látist en rúmlega 600 hlotið bata. Árlega látast að meðaltali fimm konur úr leghálskrabbameini.
Á ári hverju eru 27 þúsund leghálssýni skoðuð hjá frumurannsóknarstofu Leitarstöðvarinnar. Um 14 þúsund konur koma á Leitarstöðina en auk þess taka sjálfsstætt starfandi kvensjúkdómalæknar og ljósmæður á heilsugæslum leghálssýni sem send eru til rannsókna á Leitarstöð.
Á rannsóknarstofunni starfar sérhæft starfsfólk og nýtt starfsfólk þarf um það bil ár í þjálfun til að öðlast nægilega færni til að geta leitað að afbrigðilegum frumum.
„Sérhæfð þekking skiptir gífurlega miklu máli og er þessi þekking á Íslandi bundin við rannsóknarstofu Krabbameinsfélagsins. Hún finnst ekki annars staðar hér á landi. Sérhæfingin skiptir því miklu máli fyrir konur á landinu,“ segir Ingibjörg Guðmundsdóttir, yfirlæknir frumurannsóknarstofu.
„Að baki leitarstarfinu liggur hugsjón, gríðarlegur metnaður og framsýni þeirra sem komu skimunum á fót á Íslandi. Þetta hefur verið leiðarljós Leitarstöðvarinnar allt fram á þennan dag. Á Leitarstöðinni starfar fólk sem brennur fyrir því að varðveita heilsu og heill kvenna á Íslandi og árangurinn af þessu er óumdeilanlegur og með því besta sem þekkist í heiminum,“ segir Ágúst Ingi Ágústsson, yfirlæknir Leitarstöðvarinnar.