Býður hjúkrunarfræðingum í Bláa Lónið
-
Bergljót Inga Kvaran var dregin út í Vinkonuklúbbi Krabbameinsfélagsins og Halla Þorvaldsdóttir afhenti henni verðlaunin.
Bergljót Inga Kvaran, yfirhjúkrunarfræðingur á Heilsugæslunni Höfða, var dregin út í vinkonuleik Krabbameinsfélagsins og Bleiku slaufunnar í ár og hlaut í verðlaun dekur fyrir 6 á Retreat Spa í Bláa Lóninu og óvissuferð á Lava Restaurant. Bergljót kom og sótti vinninginn í Skógarhlíðina í dag.
„Ég ætla að bjóða samstarfskonum mínum, hjúkrunarfræðingunum, með mér, því ég var með þeim þegar ég fékk símtalið um að ég hefði verið dregin út,“ segir Bergljót.
Alls skráðu 4.402 konur sig í Vinkonuklúbb Krabbameinsfélagsins , en tilgangur hans er að fá konur til að gerast liðsmenn félagsins í baráttunni gegn krabbameinum og þiggja boð um hagnýtan fróðleik og upplýsingar um viðburði sem félagið hvetur þær til að deila með öðrum.
Halla Þorvaldsdóttir, framkvæmdastjóri Krabbameinsfélagsins afhenti Bergljótu vinninginn. Og hún hvetur konur til að skrá sig í klúbbinn þótt búið sé að draga: „Allar konur eiga heima í vinkonuklúbbnum og við óskum Bergljótu innilega til hamingju með vinninginn og vonum að hjúkrunarfræðingarnir njóti heimsóknarinnar í Bláa Lónið.“
Í Vinkonuklúbbi Krabbameinsfélagsins í ár er lögð áhersla á að stuðningur skipti máli, enda eru einkennisorð Bleiku slaufunnar í ár „Mundu að þú ert ekki ein.“