Áttavitinn - rannsókn á reynslu fólks sem greinst hefur með krabbamein
Í morgun var rannsókninni Áttavitanum hleypt af stokkunum. Rannsóknin sem er á vegum Krabbameinsfélagsins hefur það að markmiði að rannsaka reynslu þeirra sem greinst hafa með krabbamein af greiningar- og meðferðarferlinu.
Áttavitinn er rannsókn á vegum Krabbameinsfélagsins sem einstaklingum, sem greindust með krabbamein á árunum 2015 – 2019 og voru á aldrinum 18 – 80 ára, býðst að taka þátt í. Markmiðið er að rannsaka reynslu þeirra af greiningar- og meðferðarferlinu.
Það er von okkar að niðurstöður rannsóknarinnar geti stutt við vinnu Krabbameinsfélagsins að bættum aðstæðum þeirra sem greinast með krabbamein, þar sem þær munu gefa góða innsýn í hvernig þörfum þeirra sem greinast er mætt og hvort og hvar úrbóta er þörf. Rannsóknin mun einnig varpa ljósi á andlega og líkamlega heilsu þeirra og getur þannig leitt til betri stuðnings við þá sem greinast með krabbamein.
- Nánari upplýsingar um rannsóknina má finna á síðu rannsóknarinnar.
Spurningalistinn sem notaður er í Áttavitanum er byggður á rannsókn danska krabbameinsfélags en aðlagaður að íslenskum aðstæðum. Rannsóknin er unnin í samstarfi ýmissa vísindamanna innan Krabbameinsfélagsins, Háskóla Íslands, Háskólans í Reykjavík, Maskínu og Taktikal.
Ef þú hefur spurningar um rannsóknina þá getur þú sent póst á netfangið: attavitinn@krabb.is eða hringt í síma 835 4040.
