„Andleg veikindi“ - ekki komið frá félaginu
Á frétt á vef Fréttablaðsins í morgun og í hádegisfréttum RÚV krefjast notendasamtökin Hugarafl þess að stjórnendur Krabbameinsfélagsins taki ábyrgð á því að fram hafi komið í fjölmiðlum að starfsmaður hafi glímt við andleg veikindi.
Krabbameinsfélagið ítrekar að fullyrðingar um að starfsmaðurinn ætti við andleg veikindi að stríða koma ekki frá félaginu. Athugasemd var gerð við þá fullyrðingu í fréttum Stöðvar tvö fimmtudagskvöldið 3. september og fengust þau svör að upplýsingarnar kæmu frá heimildarmanni fréttamannsins.
„Við höfum aldrei sagt til um eðli veikinda umrædds starfsmanns. Það var hins vegar óumflýjanlegt að greina frá því að um mannleg mistök væri að ræða, en ekki kerfislæg eða tæknileg. Það var krafa fjölmiðla og almennings að félagið úrskýrði í hverju mistökin lægju,“ segir Halla Þorvaldsdóttir, framkvæmdastjóri Krabbameinsfélagsins. Hún ítrekar hins vegar að ábyrgðin á málinu hvíli á félaginu sjálfu og stjórnendum þess, aldrei á einum starfsmanni.