Almannaheillasamtök gegna mikilvægu hlutverki við að draga úr afleiðingum Covid-faraldursins
Krabbameinsfélagið hefur reynt að bregðast við þessu ástandi, fyrir sína skjólstæðinga sem greinst hafa með krabbamein og aðstandendur þeirra, með ýmsum leiðum
Stjórn Almannaheilla hvetur félagasamtök til að styðja við félagsmenn sína og skjólstæðinga eftir öllum þeim leiðum sem tiltækar eru. Krabbameinsfélagið hefur reynt að bregðast við þessu ástandi, fyrir sína skjólstæðinga sem greinst hafa með krabbamein og aðstandendur þeirra, með ýmsum leiðum. Símaþjónusta hefur verið stóraukin og er nú veitt símaráðgjöf alla virka daga frá kl. 09-16. Símanúmerið er 800 4040 og er gjaldfrjálst. Þá hefur einnig verið lögð aukin áhersla á rafræna fræðslu af margvíslegu tagi svo sem streymi og útsendingar á margvíslegu fræðsluefni.
Til að sinna hlutverkum sínum þurfa félagasamtök sem vinna að almannaheill eins og áður að reiða sig á stuðning almennings, opinberra aðila og annarra stuðningsaðila. Þeir sem eiga þess kost að leggja af mörkum vinnu, sérfræðiþekkingu, aðstöðu eða fjármuni ættu að beina sjónum sínum til viðurkenndra samtaka og leggja þeim lið við að forða frekari skaða en sjálf veiran veldur á heilsu fólks.
Hægt er að nálgast yfirlýsingu stjórnar Almannaheilla í heild sinni hér.
