Áfengi getur valdið krabbameini
-
Laufey Tryggvadóttir talar við Sigmund Erni Rúnarsson á Hringbraut.
Vitað er að aukið aðgengi að áfengi gengur þvert á hagsmuni lýðheilsu þjóðarinnar og að það verður til þess að krabbameinstilfellum fjölgar.
Áfengisfrumvörp hafa ítrekað verið lögð fyrir Alþingi, þar sem markmiðið er að afnema einkaleyfi ríkisins á smásölu áfengis. Krabbameinsfélagið hefur gert alvarlegar athugasemdir við þessi frumvörp.
Áfengi veldur 5% af öllum brjóstakrabbameinum á Norðurlöndunum og 3% af krabbameinum í ristli og endaþarmi og samband er á milli áfengisneyslu og krabbameina í munnholi, koki, barkakýli, vélinda og lifur.
Laufey Tryggvadóttir, deildarstjóri hjá Krabbameinsfélaginu, segir að tengsl áfengis og krabbameina hafi verið þekkt í um þrjá áratugi, en vegna þess hve áfengi er mikill hluti af menningu þjóðarinnar vilji fólk helst ekki heyra af því. Tengsl brjóstakrabbameins við áfengi og krabbamein í ristli og endaþarmi eru til dæmis vel þekkt.
„Sú mýta er lífseig að eitt glas á dag sé hjartastyrkjandi, en stór rannsókn sem birtist nýlega í læknatímaritinu Lancet sýnir fram á að enginn lágmarksskammtur af áfengi er hlutlaus eða hollur. Áfengisneysla byrjar strax að hafa áhrif og veldur þremur milljónum dauðsfalla á heimsvísu á ári,“ segir Laufey.
Hún segir að ekki þurfi að hætta að neyta áfengis í hófi, en aldrei eigi að fá sér í glas til þess eins að bæta heilsuna.
Neysla áfengis eykst með batnandi efnahag
Umræða um að leyfa einnig sölu á áfengi í sérverslunum kemur reglulega upp. Svíar komust að þeirri niðurstöðu að áfengistengd dauðsföll vegna krabbameina myndu aukast um 18% ef salan færi fram í sérverslunum og enn meira ef hún færi einnig fram í almennum verslunum. Laufey segir að þessi skilaboð þurfi að berast fulltrúum okkar á Alþingi.
Í nýlegri rannsókn sem birt var í Lancet, kom fram að þriðjungur jarðarbúa neytir áfengis, að rekja megi þrjár milljónir dauðsfalla árlega til drykkjunnar og að krabbamein eru þar í efsta sæti hjá einstaklingum yfir 50 ára. Athyglisvert er að neyslan eykst með batnandi efnahag og þjóðfélagsstöðu og þess vegna er spáð auknum heilsufarsvandamálum í löndum sem eru að bæta efnahagsstöðu sína, ef ekki verður brugðist við.
Samfélagsleg ábyrgð og stefna í lýðheilsumálum
Í september 2016 kynnti velferðarráðuneytið stefnu í lýðheilsu og forvörnum, þar sem eitt af markmiðunum var að draga úr áfengisog vímuefnaneyslu á meðal ungs fólks. Í því sambandi var bent á að meðal virkra aðgerða er stýring á áfengisneyslu með verði, einkasölu ríkja og háum aldursmörkum til áfengiskaupa og þess var getið að stefnan væri í samræmi við stefnu Alþjóðaheilbrigðisstofnunarinnar (WHO) til 2020.
„WHO hefur bent á að áhrifaríkustu leiðirnar til að draga úr áfengisneyslu séu allar á valdi stjórnvalda og felist í takmörkun á framboði áfengis, verðstýringu og banni við áfengisauglýsingum. Vonandi ber Alþingi Íslendinga gæfu til að fara ekki í öfuga átt við lýðheilsustefnu, heldur beini kröftum sínum í farveg sem eflir heilsu, velferð og hamingju landsmanna,“ segir Laufey.
