70 andlit fyrir 70 ár - Einkennismerki Krabbameinsfélagsins
Gamla einkennismerki Krabbameinsfélagsins var fyrst hannað af Stefáni Jónssyni, arkitekt, um miðbik 20. aldar. Það var tvímælalaust eitt af andlitum félagsins og var einkennismerki félagsins allt til ársins 2020.
Allt frá stofnun Krabbameinsfélags Reykjavíkur árið 1949 til ársins 2020 var notast við einkennismerki sem sýndi sverð í hönd að kljást við óvætt í formi höggorms - sem táknar vitaskuld óvininn sem er krabbamein. Á myndinni má sjá vinstra megin upphaflega merkið sem var hannað af Stefáni Jónssyni (1913-1989) sem var þekktastur sem arkitekt síðar meir. Merkið var hannað fyrir Krabbameinsfélag Reykjavíkur, sem var einmitt stofnað 1949 og fékk einkennismerkið ári síðar. Árið 1950 starfaði Stefán mestmegnis sem teiknari við ýmis verkefni. Hefur því verið fleygt fram að Stefán hafi teiknað svo til öll íslensk frímerki á árunum 1948 til 1958. Hann settist síðan aftur á skólabekk og lauk prófi í bygginarlist og varð lykilmaður í skipulagsmálum í Reykjavík þegar kom að skipulagningu Árbæjar, Breiðholts og Selás.
Hægra megin má svo sjá stílfærða útgáfu merkisins sem var unnin af Auglýsingastofu Kristínar, af okkar allra fremsta hönnuði á 20. öld, Kristínu Þorkelsdóttur (f. 1936). Hún er jafnframt höfundur margra íkonískra hluta, vörumerkja, einkennismerkja eða leturgerðar sem við höfum vanist í hinu daglega lífi. Má þar nefna umbúðirnar um smjör, mjólkurfernurnar, að ógleymdum öllum peningaseðlum sem gefnir hafa verið út eftir myntbreytingu 1980 - en þá hannaði hún í samstarfi við Stephen Fairbairn. Þess má til gamans geta að Kristín var handhafi heiðursverðlauna Hönnunarverðlaunanna árið 2020 og enn fremur er bók væntanleg um verk hennar eftir þær Bryndísi Björgvinsdóttur og Birnu Geirfinnsdóttur.
Einkennismerki þeirra Stefáns og Kristínar var svo sannarlega andlit félagsins um 69 ára skeið og eitt af 70 andlitum Krabbameinsfélagsins á afmælisárinu 2021. Við ætlum að birta 70 myndir eða myndskeið af fólki sem hefur komið við sögu í baráttunni gegn krabbameinum í 70 ára sögu félagsins. Krabbameinsfélagið er rekið fyrir sjálfsaflafé með stuðningi frá íslenskum almenningi og fyrirtækjum. Við hvetjum fólk til að fylgjast með á instagram og facebook, myllumerkið er #70andlit