Frábærar viðtökur og Bleika slaufan að seljast upp
Verum bleik – fyrir okkur öll eru skilaboð Krabbameinsfélagsins í Bleiku slaufunni í ár. Þjóðin hefur sannarlega tekið Bleiku slaufuna upp á sína arma, það sjáum við ár eftir ár og erum alltaf jafn hrærð og þakklát yfir viðtökunum sem í ár hafa verið ótrúlega góðar. Nú er svo komið að Bleika slaufan er víða að seljast upp og hver að verða síðastur að næla sér í eintak.
Árni Reynir Alfredsson, forstöðumaður markaðsmála og fjáröflunar hjá Krabbameinsfélaginu segist sannfærður um að áherslan á stuðning og samstöðu sem Bleika slaufan stendur fyrir í ár skili sér í viðtökunum við slaufunni. „Það að upplifa stuðning samfélagsins skiptir þá sem eru veikir og aðstandendur þeirra mjög miklu máli og það að sjá samstöðuna í verki með því að sjá fólk bera slaufuna gerir ennþá meira.“
„Það er okkur hjá Krabbameinsfélaginu alveg augljóst miðað við viðtökurnar að öll viljum við vera bleik, fyrir okkur öll,“ segir Árni Reynir. „Við erum að sjá aukinn áhuga í mjög mörgu tilliti, til dæmis í fjölda samstarfsaðila sem vilja leggja átakinu lið, eða þeim fyrirtækjum sem óska eftir fræðsluerindum fyrir sitt starfsfólk. Þessi áhugi þarf ekki að koma okkur á óvart í ljósi þess að einn af hverjum þremur getur reiknað með því að fá krabbamein einhvern tíma á lífsleiðinni og meirihluti hinna eru aðstandendur, margir oftar en einu sinni.“
Þakklæti efst í huga
Þessar frábæru viðtökur eru afskaplega þýðingarmiklar fyrir félagið. Að meðaltali greinast 916 konur með krabbamein á ári og á lífi eru 9.586 konur sem hafa fengið krabbamein. Þrátt fyrir miklar framfarir deyja enn um 303 konur á ári úr krabbameinum. Áskoranirnar framundan hljóða upp á 52% fjölgun nýrra krabbameinstilfella til ársins 2040. Slík aukning, sem er fyrst og fremst vegna breyttrar aldurssamsetningar þjóðarinnar, hefur í för með sér mikla aukningu í þjónustuþörf.
Þeim sem nýttu ókeypis ráðgjöf sérfræðinga Krabbameinsfélagsins fjölgaði um 10% á milli 2021 og 2022 og 600 nýir skjólstæðingar hafa leitað til félagsins það sem af er þessu ári. Krabbameinsfélagið er rekið fyrir söfnunarfé og stuðningur við félagið skilar sér í öflugu fræðslu- og forvarnarstarfi, endurgjaldslausum stuðningi við fólk með krabbamein og aðstandendur þeirra, til vísinda og krabbameinsrannsókna, og gerir félaginu kleift að sinna hagsmunagæslu af heilindum og í virku samtali við alla hlutaðeigandi.
„Við erum fyrst og fremst ótrúlega hrærð og langar að koma á framfæri þökkum til allra sem taka undir með félaginu í átakinu, hvort sem er með kaupum á Bleiku slaufunni eða með öðrum hætti,“ segir Árni Reynir. „Svona viðtökur veita okkur byr undir báða vængi og hvetja okkur til að stefna alltaf hærra, með það að markmiði að ná enn betri árangri. Þótt slaufan sé að verða uppseld er átakið rétt hálfnað og enn hægt að leggja því lið með margvíslegum hætti. Svo má ekki gleyma því að Bleiki dagurinn er enn framundan, en samstaðan er aldrei jafn áþreifanleg í samfélaginu eins og á Bleika deginum. Það er dagurinn til að klæðast bleiku, gæða sér á bleikum veitingum, halda bleikt boð og fylla alla samfélagsmiðla af bleiku. Verum bleik – fyrir okkur öll.“
