Upp með sokkana í Mottumars
Yfirskrift átaksins í ár er „Ekki humma fram af þér heilsuna“ og vísar til þess að nýleg rannsókn Krabbameinsfélagsins sýndi fram á að karlmenn sem greindust með krabbamein eftir að hafa fundið fyrir einkennum biðu margir í langan tíma með að leita til læknis. Hátt í helmingur þeirra beið í þrjá mánuði eða lengur og um þriðjungur af þeim hópi beið í meira en ár.
Mottumars, árlegt árvekni- og fjáröflunarátak Krabbameinsfélagsins, er tileinkað baráttunni gegn krabbameinum hjá körlum.
Starfsemi Krabbameinsfélagsins byggir á sjálfsaflafé. Stuðningur einstaklinga og fyrirtækja við átakið er því ómetanlegur til að ná betri árangri varðandi það að draga úr fjölda krabbameinstilvika, fækka dauðsföllum af völdum krabbameina og að bæta lífsgæði þeirra sem greinast með krabbamein og aðstandenda þeirra.
Samkvæmt samantekt frá árunum 2017-2021 greindust árlega 892 karlmenn með krabbamein. Á sama tímabili létust 317 karlmenn úr krabbameinum.
Yfirskrift átaksins í ár er „Ekki humma fram af þér heilsuna“ og vísar til þess að nýleg rannsókn Krabbameinsfélagsins sýndi fram á að karlmenn sem greindust með krabbamein eftir að hafa fundið fyrir einkennum biðu margir í langan tíma með að leita til læknis. Hátt í helmingur þeirra beið í þrjá mánuði eða lengur og um þriðjungur af þeim hópi beið í meira en ár. Krabbameinsfélagið vill því hvetja karlmenn til að bíða ekki of lengi með að leita til læknis ef einkenna verður vart. Því fyrr sem krabbamein greinast, því betri eru batahorfurnar.
Upp með sokkana
Rakel Sólrós Jóhannsdóttir og Þórdís Claessen hjá 66°Norður, eiga heiðurinn af sokkunum þar sem brimrót hafsins er í aðalhlutverki. „Það var ótrúlega gaman að fá tækifæri til að hanna Mottumars sokkana í ár í samstarfi við kollega minn Þórdísi Claessen og í nánum samskiptum við Krabbameinsfélagið,“ segir Rakel Sólrós. „Með hönnuninni vildum við gera sjómanninum og hafinu hátt undir höfði með fallegu mynstri af öldum í mörgum bláum tónum. Þetta er okkar erfðaefni og grunnur 66°Norður.
https://www.youtube.com/watch?v=AWSl5KfrN3M
Baujan vísar okkur veginn
Við hönnun sokkanna unnu þær með fánalitina með aðaláhersluna á bláu tónana til þess að ná ákveðinni dýpt sem býr í sjónum. Hællinn táknar síðan rauðu baujuna í ólgusjónum, vegvísinn sem sjómenn og Íslendingar þekkja vel. „Þegar við sjáum baujuna vitum við að við erum á réttum stað. Þetta er áminningin fyrir okkur að halda utan um heilsuna,” segir Þórdís, og tengir þar með við yfirskrift átaksins sem hvetur karlmenn til að leita til læknis ef þeir eru með einkenni. „Þetta er svolítið eins og að hnýta hringinn að halda utan um hvert annað eins og hafið gerir. Það heldur utan um okkur.”
Sokkarnir fást í tveimur stærðum: 36-40 og 41-45 á hátt í 400 sölustöðum um land allt og í vefverslun Krabbameinsfélagsins.
Einkennismerki Mottumars er yfirvaraskeggið og Skeggkeppnin er í fullum gangi. Á vefsíðu Mottumars (https://www.mottumars.is/skeggkeppni/) geta vinir, vandamenn og landsmenn allir lagt málefninu lið með því að heita á keppendur í Mottukeppninni.
Mottudagurinn 31. mars
Mottumars nær hámarki föstudaginn 31. mars þegar Mottudagurinn verður haldinn hátíðlegur. Krabbameinsfélagið hvetur alla landsmenn, konur og karla, til að gera sér glaðan dag.
Nánari upplýsingar má finna á Mottumars.is.
