70 andlit fyrir 70 ár - Níels P. Dungal
Níels P. Dungal, prófessor við Læknadeild Háskóla Íslands og forstöðumaður Rannsóknarstofu Háskólans í meinafræði var fyrsti formaður Krabbameinsfélagsins. Hann er vitanlega eitt af 70 andlitum félagsins á 70 ára afmæli þess.
Níels P. Dungal (1897-1965) varð fyrsti formaður Krabbameinsfélagsins árið 1951. Var hann á þeim tíma forstöðulæknir Rannsóknarstofu Háskólans í meinafræði og prófessor við Læknadeild Háskóla Íslands frá árinu 1932. Níels var brautryðjandi í rannsóknum á krabbameinum og var metnaðarfullur formaður. Hann hafði barist fyrir stofnun Krabbameinsskrár frá árinu 1949 og sá stofnun hennar verða að veruleika árið 1954. Alþjóðlegt samstarf var honum einnig ofarlega í huga og varð Krabbameinsfélag aðili að Alþjóðakrabbameinssambandi og Norrænu krabbameinssamtökunum í hans tíð. Hann var fyrsti ritstjóri Fréttabréfs um heilbrigðismál sem var víða lesið og mikilvægt fræðslutæki í forvörnum og fræðslu um krabbamein.
Níels, sem var jafnan kallaður „prófessor Dungal“, kenndi og stundaði krufningar og var þekktur fyrir vísindaleg vinnubrögð. Árið 1960 átti hann spjall við Matthías Johannessen, ungan ritstjóra Morgunblaðsins, þar sem kímnigáfa læknisins kom fram. Var Níels spurður, hvort hann hafi aldrei verið hræddur við lík. „Nei, það er ég ekki. Þegar ég var drengur, var ég alinn upp í spíritisma og var hræddur við dautt fólk. En þegar ég fór að kryfja, vandist þetta af mér. Ég er ekki hræddur við dauða menn, þeir lifandi eru miklu hættulegri, það hefur mér reynzt.“
Níels P. Dungal er eitt af 70 andlitum Krabbameinsfélagsins á afmælisárinu 2021. Við ætlum að birta 70 myndir eða myndskeið af fólki sem hefur komið við sögu í baráttunni gegn krabbameinum í 70 ára sögu félagsins. Krabbameinsfélagið er rekið fyrir sjálfsaflafé með stuðningi frá íslenskum almenningi og fyrirtækjum. Við hvetjum fólk til að fylgjast með á instagram og facebook, myllumerkið er #70andlit
