Ragnheiður: Greiningin breytti lífi mínu
Ragnheiður Guðmundsdóttir er 37 ára og greindist með krabbamein í lífhimnu og lifur fyrir ári síðan. Kvíði, áfallastreita og þunglyndi fylgdu veikindunum og hún vill hjálpa öðrum með stuðningi í Stuðningsnetinu.
„Það skiptir miklu máli að finnast maður ekki vera einn“
„Það að greinast með krabbamein hefur breytt lífi mínu. Þetta breytir manni sem manneskju og hvernig maður horfir á lífið. Maður þarf að læra inn á sig aftur og læra hvernig maður fúnkerar í umhverfinu sem nýr og breyttur einstaklingur. Þetta getur valdið kvíða og maður þarf að finna nýjar leiðir til að hlutirnir virki. Ég hef reynt að komast að því hver ég er í dag, eftir veikindin, og hvernig ég get komið aftur inn í samfélagið. Að reyna finna leiðir hvernig ég vinn með kvíðann, áfallastreituna og þunglyndið sem óneitanlega fylgja svona veikindum. Ef ég get hjálpað einhverjum öðrum, þá gefur það lífinu tilgang og því er ég stuðningsfulltrúi í Stuðningsnetinu.
Í jafningjastuðningi finnur maður að maður er ekki einn. Það eru fleiri sem deila þessari lífsreynslu sem maður er að ganga í gegnum. Kannski er einhver búinn að finna einhver bjargráð sem þú hefur ekki enn fundið og getur deilt þeim með þér. Það er mikilvægast að finna að maður er ekki einn í þessari stöðu.
Ég var sjálf ekki nógu dugleg að hafa samband við stuðningsfulltrúann sem ég fékk. Við hittumst aldrei vegna þess að ég bjó í Hveragerði. Ég nýtti mér hann ekki nógu mikið til að átta mig á því hvernig hann hjálpaði. En í dag veit ég betur. Það gaf mér von og hjálpaði mér að finnast ég ekki vera ein og geta talað við aðra t.d. á viðburðum hjá Krafti sem hafa gengið í gegnum það sama og fá fullan skilning. Þegar maður talar við fólk sem hefur ekki greinst með krabbamein þá veit það ekki alltaf um hvað þú ert að tala og það veit ekki hvernig það á að svara manni. Mikilvægt er að geta talað við einhvern sem hefur skilning á því sem þú ert að ganga í gegnum.“
Ragnheiður er stuðningsfulltrúi í Stuðningsnetinu
