Anna Lára: Maður er ekki einn í heiminum
Anna Lára Magnúsdóttir er 47 ára og greindist fyrir sjö árum með brjóstakrabbamein. Henni fannst jafningjastuðningurinn veita sér von um að hún fengi gamla lífið sitt til baka.
„Jafningjastuðningurinn veitti mér von”
„Ég er stuðningsfulltrúi í Stuðningsnetinu því ég sjálf nýtti mér jafningjastuðning þegar ég greindist og ég veit því hvað hann skiptir miklu máli.
Jafningjastuðningurinn sem ég fékk veitti mér von. Sú sem var stuðningsfulltrúinn minn hafði gengið í gegnum brjóstakrabbamein og lyfjameðferð og það gekk vel hjá henni. Það veitti mér von um að þetta yrði allt gott aftur og maður fengi lífið til baka. Það skiptir líka svo miklu máli að maður einangri sig ekki heldur þiggi hjálp og stuðning. Það var svo gott að hitta einhvern sem maður getur samsamað sig við og maður finnur samkennd með. Hitta einhvern sem er á svipuðu róli sem þú getur spurt spurninga og fengið svör frá.
Það er svo gott að heyra líka sögu annarra því þetta snýst allt um að maður sé ekki einn í heiminum með þetta.”
Anna Lára er stuðningsfulltrúi í Stuðningsnetinu