Njótum jólakræsinga
Jólunum fylgja allskyns ljúffengar kræsingar sem okkur þykja oft algerlega ómissandi og eiga stóran hlut í jólastemningunni. Þetta á til dæmis við um ýmis sætindi, reyktan mat og ýmislegt fleira sem flestir eru þó meðvitaðir um að borða ætti í hófi.
Í aðdraganda jóla getur því verið gott að skipuleggja fram í tímann hvað og hvernig við ætlum að borða þannig að við njótum matarins en á skynsamlegan hátt.
Njóttu matarins hægt og með skilningarvitin opin
Hugum að magninu sem fer á diskinn og gefum meðlætinu (s.s. grænmeti og jafnvel ávöxtum) meira pláss. Við getum til dæmis fengið okkur litla sneið af hangikjötinu og skorið það í smáa bita en fengið okkur meira af grænu baununum og kartöflunum á móti. Við fáum góða bragðið, bara í aðeins öðrum hlutföllum. Einnig njótum við þess kannski jafn vel að leyfa einum konfektmola að bráðna hægt í munninum eins og að borða 4 mola hratt á sama tíma ef við bara veitum bragðinu meiri athygli. Við hvetjum þig til að prófa. Verum með skilningarvitin vakandi þegar við njótum matarins. Horfum, lyktum, finnum bragð, áferð og látum hugann reika - fáum þannig meira út úr minna magni af mat.
Prófaðu að breyta til – þú getur komið þér upp nýjum hefðum
Oft er hægt að breyta gömlum fjölskylduuppskriftum eða gera eitthvað allt annað og koma sér upp nýjum hefðum í jólamatnum. Það er okkur í hag að auka hlut grænmetis, ávaxta og heilkornavara, velja oftar fisk og sjávarfang, baunir og fuglakjöt en halda reyktum og söltuðum kjöt- og fiskvörum í lágmarki. Víða má finna uppskriftir af kökum og sætindum þar sem miðað er að því að draga úr sykri og einnig er jákvætt að nota heilhveiti til helminga á móti venjulegu hveiti í bakstrinum. Matreiðslurjómi inniheldur minna af mettaðri fitu en venjulegur rjómi og jurtaolíur henta líka vel í bakstur og eldamennsku og er gott að nota þær til móts við harðari fitu sem finna má í smjöri.
Heilsusamlegt mataræði dregur úr líkum á krabbameinum
Heilsusamlegt mataræði og mátulegar skammtastærðir stuðla að vellíðan og betri heilsu og draga meðal annars úr líkum á ákveðnum krabbameinum . Áhrif mataræðis á heilsuna byggja á því sem við gerum að jafnaði árið um kring. Ef við fylgjum ráðleggingum um heilsusamlegt mataræði að mestu leyti og tökum alla jafna góðar ákvarðanir í þessum málum nýtur heilsa okkar góðs af, jafnvel þótt við leyfum okkur að bregða út af venjunni við sérstök tækifæri eins og jólahátíðin vissulega er.