Margar umsóknir í Vísindasjóð Krabbameinsfélagsins
Vísindasjóður Krabbameinsfélags Íslands auglýsti í síðasta mánuði eftir umsóknum um styrki í fyrsta sinn, en sjóðurinn var stofnaður fyrir rúmu ári með 250 milljóna króna stofnframlagi. Umsóknarfrestur var til 1. mars og bárust alls 23 umsóknir. Vísindaráð félagsins er nú að hefja vinnu við að leggja faglegt mat á umsóknirnar en síðan tekur stjórn sjóðsins ákvörðun um úthlutun styrkja. Má búast við að heildarupphæð styrkja verði allt að 50 milljónir króna. Stefnt er að því að kynna niðurstöður á aðalfundi Krabbameinsfélags Íslans í byrjun maí.
Markmið Vísindasjóðs Krabbameinsfélags Íslands er að efla íslenskar rannsóknir á krabbameinum með því að styrkja með fjárframlögum rannsóknir á orsökum krabbameina, forvörnum, meðferð og lífsgæðum sjúklinga. Formaður sjóðsstjórnar er Stefán Eiríksson lögfræðingur.
