Upprennandi rokkstjörnur söfnuðu fyrir Krabbameinsfélagið
Karólína Bríet og Helga Júlía eru sjö ára vinkonur úr Laugardalnum. Þær héldu styrktartónleika þann 13. mars síðastiðinn og söfnuðu fyrir Krabbameinsfélagið. Þær léku bæði frumsamið efni og þekkta slagara - og svo afmælissönginn fyrir ömmu hennar Helgu.
Vinkonurnar Helga Júlía og Karólína Bríet eru ungar og upprennandi rokkstjörnur úr Laugardalnum í Reykjavík. Þær héldu tónleika síðastliðna helgi í götunni sinni og leyfðu áhorfendum, gestum og gangandi að styrkja gott málefni með því að leggja pening í krukku.
Rokkeinbeitingin skín í gegn hjá Karólínu og Helgu!
Þær söfnuðu rúmlega 7000 krónum sem þær ætla að færa Krabbameinsfélaginu. Helga og Karólína léku bæði frumsamið efni sem og þekkta slagara úr rokksögunni. Skemmtilegast þótti þeim að taka lagið fyrir ömmu hennar Helgu en hún átti einmitt afmæli þennan sama dag.
Krabbameinsfélagið hlakkar til að taka á móti þessum fræbæru ungu konum í Skógarhlíð og þakka þeim innilega fyrir frábært framlag.
Karólína Bríet og Helga Júlía eiga framtíðina fyrir sér. Myndir: Stella Björk Hilmarsdóttir.
