Starfsfólk Símans styrkir Krabbameinsfélagið
„Krabbamein snertir okkur öll, við leggjum okkar af mörkum til minningar um vini okkar og samstarfsfólk sem lotið hefur í lægra haldi í baráttunni við krabbamein í gegnum árin og hugsum fallega til þeirra með því að styðja Krabbameinsfélagið„ segir Anna María.
Hjá Símanum er hjarta fyrirtækisins Kaffigarðurinn, kaffihús þar sem starfsfólk hittist með form- og óformlegum hætti og fær sér kaffi og kræsingar hjá Önnu Maríu Jónsdóttur, kaffibarþjóni Kaffigarðsins.
Eins og fyrri ár seldi Anna María Bleiku slaufuna í Kaffigarðinum og hvatti starfsfólk til að styðja við Krabbameinsfélagið ásamt því að minna öll sem komu í Kaffigarðinn að klæðast bleiku á Bleika deginum. Krabbameinsfélagið kom svo og flutti fræðslufyrirlestur um forvarnir.
Starfsfólk Símans svaraði kalli Önnu Maríu og seldust alls 100 Bleikar slaufur, sú síðasta á Bleika deginum sjálfum. Anna María ásamt öðru starfsfólki hvatti svo Símann til að styðja við átakið og Síminn lagði því til sömu upphæð og starfsfólk hafði keypt slaufur fyrir.
Krabbameinsfélagið þakkar starfsfólki Símans kærlega fyrir hlýhug og góðan stuðning.
