Sokkarnir komnir! Ebenezer fékk fyrsta parið
Hinir sívinsælu mottumarssokkar eru loksins komnir í hús og getur fólk nálgast þá í vefverslun Krabbameinsfélagsins og völdum verslunum um allt land. Covid-faraldurinn setti komu þeirra í uppnám en nú er mikil gleði, þeir eru loksins komnir.
Það var mikil
gleðistund í heimkynnum Krabbameinsfélagsins í Skógarhlíð í morgun þegar
Mottumarssokkarnir bárust loksins í hús. Vegna Covid heimsfaraldursins og
veðurofsa í Evrópu í síðustu viku tafðist afhending sokkana um rúmar tvær
vikur. Sala á sokkunum er venjulega einn af hornsteinum fjáröflunar félagsins. Sokkana er hægt að versla hér í vefverslun en einnig í völdum verslunum um land allt.
Ólöf Jakobína Ernudóttir, verslunarstjóri Vefverslunar Krabbameinsfélagsins, opnaði fyrsta kassann og er stolt af glæsilegri vöru.
Krabbameinsfélagið er alfarið rekið fyrir styrktarfé frá almenningi – og því augljóslega bagalegt að upplifa þessar tafir. En markmiðið er að snúa þessum vandræðum í tækifæri. „Ég er fullviss um að þjóðin hafi beðið eftir sokkunum með sömu óþreyju og við,“ segir Halla Þorvaldsdóttir, framkvæmdastjóri Krabbameinsfélagsins. „Það er orðin hefð hjá fólki að næla sér í mottumarssokka rétt fyrir páska og njóta þess að klæðast nýjum sokkum á meðan páskaeggið er maulað í rólegheitunum. Ég held að í ár verði engin breyting þar á.“
Fyrsta parið í ár fékk Ebenezer Bárðarson, eða réttara sagt fyrstu 60 pörin, en hann fer með þau rakleiðis á Sólheima, þar sem íbúar og starfsfólk hafa ávallt keypt sokka. Ebenezer hefur einnig komið árlega til Krabbameinsfélagsins til að hjálpa til við pökkun og dreifingu sokkana í marsmánuði – og því einkar vel við hæfi að hann taki við fyrstu pörunum eftir þessa löngu bið.
Halla Þorvarldsdóttir færði Ebenezer Bárðarsyni fyrsta parið.
Árlega seljast milli 20 og 30 þúsund pör af sokkum, sem eru hluti árveknisátaks Krabbameinsfélagsins um krabbamein í körlum. Því er augljóst að sokkarnir njóta mikilla vinsælda og eiga margar íslenskar fjölskyldur margra ára lager af þessum skemmtilegu sokkum.
Á sama tíma hafa í ár rúmlega 600 karlmenn um allt land, og reyndar rétt um tugur kvenna, safnað eða borið yfirvaraskegg og safnað áheitum fyrir málefnið, til að sýna körlum samstöðu, þeim sem hafa greinst með krabbamein og aðstandendum þeirra. Hjá Krabbameinsfélaginu geta krabbameinsgreindir og aðstandendur sótt sér ókeypis ráðgjöf og þjónustu sálfræðinga allt árið um kring, félagið styður dyggilega við krabbameinsrannsóknir í gegnum Vísindasjóð félagsins og þá er einn mikilvægasti þáttur í starfinu fræðsla og forvarnir til að koma í veg fyrir nýgengi krabbameina.
Það eru ekki síst samstarfsaðilar Krabbameinsfélagsins sem gera því kleift að koma sokkunum til þjóðarinnar. Það eru TVG Zimsen sem flytja og dreifa sokkum frítt um allt land, Icelandair Cargo sem flutti sokkana frítt frá Belgíu í vikunni, og loks Margt Smátt sem sá um framleiðslu á sokkunum.
Á myndunum má sjá fyrst Ólöfu Jakobínu Ernudóttur, verslunarstjóra Vefverslunar Krabbameinsfélagsins opna fyrsta kassann.
Hér má sjá Höllu, Sigurgeir Má Halldórsson, fulltrúa Icelandair Cargo, Árna Ezra Einarsson, frá Margt smátt, Ólöfu Jakobínu Ernudóttur, verslunarstjóra Vefverslunar Krabbameinsfélagsins, og Anton Ingibjart Antonsson, frá TVG Zimsen, fagna komu sokkana af mikilli innlifun.
