Samstarfssamningur milli Krabbameinsfélags Austfjarða og Fjarðabyggðar
-
Það voru þau Hrefna Eyþórsdóttir, formaður Krabbameinsfélags Austfjarða, og Jón Björn Hákonarson, bæjarstjóri Fjarðabyggðar, sem skrifuðu undir samninginn .
Samningurinn er til þriggja ára og felur í sér samstarf og vinnu við lífstílstengdar forvarnir og fræðslu í Fjarðabyggð.
Forvarnir eru mikilvægur þáttur í lífi hvers manns þar sem það bætir lífsgæði, minnkar líkur á og seinkar lífstílstengdum sjúkdómum. Eins og tölurnar eru í dag á Íslandi fær 1 af hverjum 3 krabbamein einhvern tímann á lífsleiðinni. Með því að stunda heilbrigðan lífsstíl er hægt að koma í veg fyrir 4 af hverjum 10 krabbameinum og því til mikils að vinna.
Með þessum samningi greiðir Fjarðabyggð Krabbameinsfélagi Austfjarða 500.000 kr. á ári til næstu þriggja ára, 2021-2023 og á móti kemur Krabbameinsfélag Austfjarða að fastri árlegri forvarnarfræðslu á starfsmannadegi Fjarðabyggðar. Þá mun félagið koma með hugmynd af fræðsludagskrá fyrir starfsmenn sveitarfélagsins í upphafi árs til að byggja á miðlun efnis til þeirra meðal annars inn á starfsmannavef Fjarðabyggðar, workplace.
Félagið kemur einnig að fræðslu á starfsdegi í skólastofnunum Fjarðabyggðar varðandi forvarnir sem og fræðslu í tengslum við börn sem aðstandendur þeirra sem greinast með krabbamein.
Félagið kemur að og tekur þátt í einhverjum viðburðum og fræðslu í Heilsueflandi samfélagi sem Fjarðabyggð er. Þá verður félagið í samskiptum við Fjölskyldusvið Fjarðabyggðar varðandi þá þjónustu sem er í boði á hvorum stað til að getað boðið íbúum og skjólstæðingum okkar upp á alla þá þjónustu sem er í boði og að þjónustuaðilar séu að tala saman og viti hverjir af öðrum.
Einnig getur Fjarðabyggð leitað til félagsins og bent sínu starfsfólki á ráðgjöf og aðstoð hjá félaginu vegna krabbameinsveikinda.
Þess utan sendir félagið fræðsluefni í tengslum við Mottumars og Bleikan október til Fjarðabyggðar sem getur þá áframsendir það á sitt starfsfólk.
- Sjá nánari upplýsingar um Krabbameinsfélag Austfjarða
