Mottumarssokkarnir loksins væntanlegir
Við höfum beðið þolinmóð í rúmar tvær vikur en nú er loksins komið að því, Mottumarssokkarnir eru væntanlegir í verslanir fyrir helgi. Covid-heimsfaraldurinn hefur valdið töfum á sokkunum sem áttu að koma í upphafi mars.
Loksins, loksins, loksins. Sokkarnir eru á leiðinni! Mottumarssokkarnir hafa skipað ómissandi sess í hjörtum, eða öllu heldur á fótum, Íslendinga um árabil. Í ár voru heldur óvenjulegar aðstæður sem urðu til þess að flutningur á sokkunum tafðist um rúmlega tvær vikur. En nú er biðin senn á enda.
Sokkarnir í ár eru með sportlegu sniði og passa vel við íslensku fánalitina. Við erum viss um að þeir eigi eftir að vekja lukku hjá öllum Íslendingum. Verða þeir til í stærðum frá 36-40 annars vegar og 41-45 hins vegar.
Sokkarnir eru væntanlegir til okkar í Skógarhlíðina á fimmtudag og ætlar starfsfólk Krabbameinsfélagsins að leggjast öll á eitt við að koma sem flestum pörum í verslanir. Jafnframt verður opnað fyrir sölu á sokkunum í vefversluninni okkar um leið og pörin eru komin í hús.
Sala á Mottumarssokkum er einn af hornsteinum Krabbameinsfélagsins og gerir því kleift að starfa í þágu krabbameinsgreindra á Íslandi og aðstandenda þeirra, að krabbameinsrannsóknum og réttindamálum, að endurgjaldslausri þjónustu allt árið um kring.
https://www.youtube.com/watch?v=QJFW24-zOnY
