Með hjartað á réttum stað
-
Frá vinstri: Bjarni Leó Sævarsson, Auður Bríet Rúnarsdóttir, Embla Karen Sverrisdóttir, Árni Reynir Alfredsson, forstöðumaður markaðsmála og fjáröflunar hjá Krabbameinsfélaginu, Arnar Daníel Aðalsteinsson og Adolf Daði Birgisson.
Nemendur í frumkvöðlafræði við Fjölbrautaskólann í Garðabæ komu færandi hendi með 110.000 krónur sem þau söfnuðu til styrktar Krabbameinsfélaginu. Styrktarféð var ágóði skólaverkefnis sem var liður í Fyrirtækjasmiðju á vegum Ungra frumkvöðla - JA Iceland.
„Upprunalega vorum við með aðra viðskiptaáætlun sem gekk síðan ekki upp hjá okkur. Þá kom þessi hugmynd um að nýta tímasetninguna, Mottumars, og láta ágóðann af verkefninu renna til Krabbameinsfélagsins,“ segir Arnar Daníel Aðalsteinsson, einn af frumkvöðlunum sem stóðu að verkefninu.
Flestir úr hópnum eru að útskrifast nú í vor og hafa þau setið frumkvöðlaáfanga í FG. Markmiðið með áfanganum er þátttaka í fyrirtækjasmiðju JA Iceland, sem sameinar framhaldsskólanemendur á landsvísu í keppni um bestu viðskiptahugmyndina. Afraksturinn er síðan sýndur á vörumessum í Reykjavík, á Ísafirði og Akureyri.
Hópurinn lét framleiða armbönd í Mottumarslitunum og seldi, m.a. á vörumessunni í Smáralind og til vina og vandamanna. Ágóðinn af sölunni, 110.000 krónur, rann óskiptur til Krabbameinsfélagsins og kemur að góðum notum í starfi félagsins. Það er vert að taka fram að það var ekki skilyrði verkefnisins að ágóðinn rynni til góðra verka, heldur val hópsins.
Framtíðin er heldur betur björt þegar unga fólkið okkar sýnir hlýhug og stuðning í verki og við færum þeim hjartans þakkir fyrir framlag sitt.