Matardiskar stækka um 15% á milli kynslóða
Á síðustu öld hafa matardiskar landsmanna stækkað um nánast 15% á milli kynslóða og matarskammturinn sem fer á diskana sömuleiðis.
Þetta er ekki vegna aukinnar orkuþarfar þjóðarinnar, en hefur áhrif á það hversu mikið við látum ofan í okkur.
„Ef við tökum matardiskana mína, mömmu og ömmu er áhugavert að sjá stærðarmuninn. Með kynslóðunum hreyfum við okkur minna, margir eru í kyrrsetuvinnu og því augljóst að orkuþörfin er minni, ef eitthvað er, á milli kynslóða,“ segir Birna Þórisdóttir, doktor í næringarfræði og sérfræðingur í forvörnum og fræðslu hjá Krabbameinsfélaginu. „Diskarnir ættu eiginlega að fara minnkandi ef við leggjum áherslu á að borða í takt við hreyfingu og orkunotkun.“
Þróunin í sölu matvæla hefur einnig verið á þá leið að hvetja til meiri matarneyslu sem tengja má við þyngdaraukningu þjóðarinnar síðustu áratugi. „Matvælaframleiðendur og veitingastaðir auglýsa alls kyns tilboð til að fá okkur til að kaupa meiri mat og borða meira; tveir fyrir einn, keyptu tvo og fáðu þriðja frían, borgaðu aðeins meira og tvöfaldaðu skammtinn. Skilaboðin eru algjörlega úr takt við þörfina,“ segir Birna.
Ofþyngd er einn áhættuþáttur í fjölda sjúkdóma, en hæfileg líkamsþyngd er einn þeirra þátta sem lögð er áhersla á þegar kemur að forvörnum gegn krabbameinum.
Fræðsludeild Krabbameinsfélagsins býður upp á fyrirlestra, meðal annars á vinnustöðum, með áherslu á forvarnir gegn krabbameinum. Sex lykilþættir eru taldir til áhrifaríkra forvarna; tóbaksvarnir, áfengisvarnir, sólarvarnir, hreyfing, hollt mataræði og hæfileg líkamsþyngd.
