Laus störf: sérfræðingar á sviði forvarna og tölfræði
Krabbameinsfélagið leitar að tveimur metnaðarfullum sérfræðingum til starfa við forvarnir og fræðslu, tölfræði og gagnavinnslu.
Hjá Krabbameinsfélaginu starfar mjög öflugur og fjölbreyttur hópur sérfræðinga sem vinnur í þágu fólksins í landinu að markmiðum félagsins: að fækka þeim sem veikjast af krabbameinum, draga úr dauðsföllum af völdum krabbameina og bæta lífsgæði sjúklinga og aðstandenda þeirra.
Fræðsla og forvarnir:
Við leitum að skapandi, skipulögðum, sjálfstæðum og drífandi eldhuga í fjölbreytt starf. Starfshlutfall er 70 – 100%.
Starfið felst meðal annars í að vinna að ýmiskonar fræðsluefni sem snýr að forvörnum og mörgum öðrum málefnum sem varða krabbamein á fjölbreyttan hátt og vinnu við átaksverkefni og viðburði auk annars samstarfs við aðrar deildir félagsins og samstarfsaðila.
Starfið gerir kröfu um mjög góða færni í að tjá sig í riti og ræðu, þjónustulund, sjálfstæði og frumkvæði í starfi, skipulagshæfileika, færni og lipurð í samskiptum.
Viðkomandi skal vera heilbrigðisstarfsmaður. Viðbótarmenntun, til dæmis í lýðheilsuvísindum er kostur. Góð íslenskukunnátta er áskilin auk kunnáttu í ensku og Norðurlandamáli.
Umsóknir, ásamt náms- og starfsferilsskrám og afritum af prófskírteinum og starfsleyfum, skal senda Sigrúnu Elvu Einarsdóttur, teymisstjóra, á netfangið sigrunelva@krabb.is í síðasta lagi 8. september nk. Sigrún Elva veitir einnig nánari upplýsingar.
Rannsókna- og skráningarsetur:
Við leitum að öflugum liðsfélaga með hjartað á réttum stað, til starfa á sviði tölfræði og gagnavinnslu. Um er að ræða fjölbreytt og lifandi starf, 70-100% starfshlutfall.
Helstu verkefni eru tölfræðileg úrvinnsla, gagnavinnsla í rannsóknarverkefnum, afhending gagna úr krabbameinsskrá til samanburðar við önnur lönd, gagnaöryggi, leiðbeining nemenda og skráning krabbameina. Í starfinu er gerð krafa um sjálfstæði og frumkvæði, mikla nákvæmni í vinnubrögðum og hæfni í samskiptum.
Viðkomandi skal hafa háskólamenntun í heilbrigðisverkfræði, tölfræði eða sambærilega menntun. Góð almenn tölvuþekking, reynsla af forritun og gagnavinnslu er nauðsynleg svo og áhugi á krabbameinsrannsóknum, tölfræði og faraldsfræði. Góð íslenskukunnátta og kunnátta í ensku og gjarnan einu Norðurlandamáli er nauðsynleg.
Umsóknir, ásamt náms- og starfsferilsskrám og afritum af prófskírteinum og starfsleyfum, skal senda Laufeyju Tryggvadóttur, forstöðumanni laufeyt@krabb.is í síðasta lagi 8. september nk. Laufey veitir einnig nánari upplýsingar.