Karlmenn sitja heima á sunnudaginn
Vegna verkfalls Eflingar er of mikil óvissa um hvort hægt sé að halda Karlahlaupið á sunnudaginn eins og fyrirhugað var og hlaupinu því frestað. Ný dagsetning verður tilkynnt mjög fljótlega.
Fyrirhugað var að Karlahlaup Krabbameinsfélagsins myndi marka upphaf Mottumars í ár.
“Vegna verkfalls Eflingar er of mikil óvissa um hvort félaginu sé kleift að halda Karlahlaupið á sunnudaginn eins og fyrirhugað var en félagsmenn Eflingar sjá um lokanir gatna og mokstur á stígum” segir Halla Þorvaldsdóttir framkvæmdastjóri Krabbameinsfélagins.
“Þetta er auðvitað afar bagalegt, sérstaklega fyrir alla þá sem höfðu gert ráðstafanir varðandi það að taka þátt í hlaupinu en haft verður samband við alla þá sem hafa skráð sig. Ný dagsetning verður tilkynnt mjög fljótlega en stefnt er að því að hlaupið muni marka lok Mottumars í stað upphafs átaksins eins og ráðgert var enda trúum við því að samningsaðilar hafi þá náð saman. Kosturinn er að nú gefst karlmönnum enn betri tími til undirbúnings fyrir Karlahlaupið.”
