Central Iceland styrkir Bleiku slaufuna um 2.467.000 krónur
Rakel Þórhallsdóttir eigandi Central Iceland afhenti á dögunum Bleiku slaufunni ágóðann af sölu bleiku húfunnar og treflanna að upphæð 2.467.000 kr. Verkefnið hófst í fyrra með sölu á bleika treflinum sem seldist upp og í ár bættist bleika húfan við og aftur seldist bæði trefillinn og húfan upp.
Krabbameinsfélagið þakkar Rakel fyrir hennar frábæra framlag sem skiptir svo sannarlega máli fyrir starfsemi Krabbameinsfélagsins og mun nýtast til mikilvægra verka s.s. endurgjaldslausan stuðning og ráðgjöf við þá sem greinast með krabbamein, aðstandendur þeirra og syrgjendur, rannsókna á krabbameinum, forvarna og fræðslu.
https://www.youtube.com/watch?v=ozOjYQxOnrM
Margir í fjölskyldu Rakelar eru arfberar stökkbreyttra BRCA gena og þekkir hún því mjög vel til starfsemi Krabbameinsfélagsins. Með sölu á vörunum vildi Rakel leggja sitt af mörkum til að styðja við mikilvæga starfsemi Krabbameinsfélagsins.
Kærar þakkir Rakel fyrir þitt óeigingjarna framlag, takk allir sem tókuð þátt í myndatökunni og allir sem keyptuð trefilinn og húfuna.
