70 andlit fyrir 70 ár - Þorvarður Örnólfsson
Þorvarður Örnólfsson var brautryðjandi í tóbaksvarnarstarfi á Íslandi. Hann var ráðinn sem framkvæmdastjóri Krabbameinsfélags Reykjavíkur og gegndi því starfi í rúma tvo áratugi. Þorvarður er eitt 70 andlita Krabbameinsfélagsins.
Í allmörg ár þrammaði Þorvarður Örnólfsson lögfræðingur og kennari einn síns liðs um landið dragandi á eftir sér níðþunga kvikmyndavél og hafði með í farteskinu eftirminnilegar myndir um lungnauppskurði sem fljótlega urðu landsfrægar. Þorvarður átti sjálfur frumkvæði að því að Krabbameinsfélag Reykjavíkur réði hann í vinnu til að sinna þessu mikilvæga verkefni.
Þegar Þorvarður hóf störf hjá Krabbameinsfélaginu reykti ríflega helmingur unglinga sem brautskráðust úr grunnskóla og fjórir af tíu reyktu daglega. Ekki var óalgengt að tólf ára börn væru byrjuð að reykja. Með tímanum byggði Þorvarður upp tóbaksvarnadeild Krabbameinsfélagsins, fulltrúar þeirrar deildar heimsóttu flesta nemendur í efstu bekkjum grunnskóla árlega með tveggja tíma fræðsludagskrá auk þess að halda námskeið fyrir follorðna sem vildu hætta að reykja.
Starfið skilaði árangri. Reykingar unglinga minnkuðu jafnt og þétt og margir áfangasigrar náðust. Í dag mælast vart reykingar meðal grunnskólanema, þetta tókst okkur!
Þetta frumkvöðlastarf Krabbameinsfélags Reykjavíkur undir stjórn Þorvarðar er meðal mestu afreka fyrirbyggjandi heilsuverndar á Íslandi. Hlaut hann viðurkenningu heilbrigðisþings 2003 og viðurkenningu Lýðheilsustöðvar 2008 fyrir framlag sitt til tóbaksvarna.
Þorvarður Örnólfsson (1927-2013) er eitt af 70 andlitum Krabbameinsfélagsins á afmælisárinu 2021. Við ætlum að birta 70 myndir eða myndskeið af fólki sem hefur komið við sögu í baráttunni gegn krabbameinum í 70 ára sögu félagsins. Við hvetjum fólk til að fylgjast með á instagram og facebook, myllumerkið er #70andlit
